कल्याणकारी कोषको २ करोड बढी अपचलनमा सेनाका दुई तारे जर्नेल मुछिए, पूर्वजमदार पनि पक्राउ

काठमाडौं– नेपाली सेनाका दुई तारे जर्नेलसमेतको संलग्नतामा कल्याणकारी कोषको दुई करोड बढी रकम घोटाला भएको छ। यो घोटालाको विषय ७ बर्षपछि पत्ता लागेको हो। 

यस प्रकरणमा संलग्न पेन्सन भएका पूर्वजमदारलाई जिल्ला प्रहरी परिसर काठमाडौंले पक्राउ गरेको छ। नेपाली सेनाको जङ्गी अड्डाको पत्रका आधारमा पक्राउ गरिएकामाथि अनुसन्धान जारी छ।

बहालवाला सहायक रथी (दुई तारे जर्नेल) रोशन खड्का र बहालवाला सेनानी (मेजर) बोधराज कार्कीसमेतको मिलेमतोमा सैनिक कल्याणकारी निर्देशनालय अन्तर्गतको आवास तथा बीमा शाखाबाट २ करोड २१ लाख ८५ हजार ५१५ रुपैयाँ घोटाला भएको खुलेको हो।

यो प्रकरणमा नेपाली सेनाका अवकाशप्राप्त जमदार ४५ वर्षीय आत्मराम थापा पक्राउ गरिएको हो। 

यही प्रकरणमा संलग्न रहेको आरोप लागेका अवकाशप्राप्त प्रमुख सेनानी (कर्णेल) लक्ष्मण अधिकारी भने अहिलेसम्म फरार छन् ।

सैनिक प्रहरी गण जंगीअड्डाले ३१ चैत २०८१ मा जिल्ला प्रहरी परिसर भद्रकाली, काठमाडौंलाई पत्राचार गर्दै यो प्रकरणको अनुसन्धान गर्न भनेको थियो ।

परिसरले गरेको अनुसन्धान प्रतिवेदनका आधारमा जिल्ला सरकारी वकिल कार्यालयले काठमाडौं जिल्ला अदालतमा आपराधिक विश्वासघातको कसुरमा मुद्दा दायर गरेको छ। 

मुलुकी फौजदारी अपराध संहिता २०७४ को दफा २५२ को कसुरमा थापा र अधिकारीविरुद्ध मुद्दा दायर भएको छ।

जसमा ठगी बराबरको रकम २ करोड २१ लाख ८५ हजार ५१५ रुपैयाँ बिगो र क्षतिपूर्ति समेत मागदाबी गरिएको छ। 

आपराधिक विश्वासघात गर्नेलाई ५ वर्षसम्म कैद र ५० हजार रुपैयाँसम्म जरिवाना हुने व्यवस्था रहेकाले सोही अनुसार मागदाबी गरिएको छ ।

२ करोड रकम अपचलनको आरोपमा पक्राउ परेका पूर्वजमदारले भने त्यतिबेलाका हाकिमहरूको निर्देशनमा आफूले काम गरेको भन्दै बयान दिएपछि सेनाका उच्च तहका व्यक्ति पनि अनुसन्धानमा तानिएका छन्। नेपाली सेनाले कोर्ट मार्सलको तयारी समेत गरेको छ।

खड्का र कार्कीसहित यो प्रकरणमा अन्य व्यक्तिहरूमाथि सेनाले आन्तरिक छानबिन गरेको स्रोतको भनाइ छ।

२०७४ सालदेखि नै सैनिक कल्याणकारी निर्देशनालबाट रकम घोटाला भएको विषय अहिले पत्ता लागेको हो। आवास तथा बीमा वापतको रकमबाट १३ कात्तिक २०७४ देखि २६ भदौ २०७५ सम्मको अवधिमा रकम घोटाला भएको थियो । यो अवधिको बीचमा १४४ वटा चेकबाट १ करोड ७४ लाख २१ हजार ३२९ रुपैयाँ अपचलन भएको थियो ।

९ फागुन २०७३ देखि १७ असोज २०७५ सम्म ४० वटा चेकमार्फत ४७ लाख ६४ हजार १८५ रुपैयाँ रकम अपचलन गरेको बताइएको छ। यो अवधिमा उक्त शाखामा कार्यरत जमदार कर्मचारी थापा कार्यरत थिए। उनैले विभिन्न व्यक्तिका काल्पनिक नाम उल्लेख गरी रकम अपचलन गरेको अनुसन्धानबाट खुलेको छ।