अभागी पार्टी : दुई पूर्वप्रधानमन्त्री, पूर्वमन्त्रीहरू र आउने पूर्वउपप्रधानमन्त्रीको क्लब

काठमाडौं– प्रतिनिधि सभामा राष्ट्रिय दलको मान्यता समेत नपाएको नेकपा एकीकृत समाजवादी पार्टी देशकै अभागी दलका रुपमा उभिएको छ।

दुई पूर्वप्रधानमन्त्री, पूर्वमन्त्रीहरूको लर्को र अब पूर्वउपप्रधानमन्त्री समेत जोडिँदा उक्त दलको जनमत बढ्ने होइन झन् कमजोर हुने अड्कल काटिन्छ। यसकारण उक्त दललाई अभागी पार्टीसहित क्लबको उपमा दिइन थालिएको छ।

अध्यक्ष माधवकुमार नेपाल र सम्मानित नेता झलनाथ खनाल उक्त दलमा रहेका पूर्वप्रधानमन्त्री हुन्। 

बरिष्ठ उपाध्यक्ष बेदुराम भुसाल, राजेन्द्र पाण्डे (पूर्वमुख्यमन्त्री) महासचिव घनश्याम भुसाल, प्रकाश ज्वाला, रामकुमारी झाँक्री, बिरोध खतिवडा, प्रेम आले, किसान श्रेष्ठ, भवानी खापुङ, जीवनराम श्रेष्ठ, मेटमणि चौधरी, शेरबहादुर कुँवरलगायत मन्त्री बनेका थिए। 

अब पूर्वउपप्रधान तथा गृहमन्त्री पटक–पटक बनेका बामदेव गौतम पनि उक्त दलमा समाहित हुने निधो भैसकेको छ।

‘यो पार्टी जनमत ल्याउने भन्दा पनि सरकारमा जाने, मन्त्री खाने अवसरवादीहरुको जस्तो मात्र बन्यो’, बामपन्थी विश्लेषकहरू भन्छन्,‘मन्त्रीबाट फिर्ता बोलाउँदा रुने, झगडा गर्ने अनि दल नै छाड्नेसम्मका हर्कत देखाइन्छ।’

यत्रो ठूलो व्यक्तित्व भएको दलले गत निर्वाचनमा पनि राम्रो जनमत ल्याउन सकेको थिएन। कांग्रेस, माओवादीलगायतको गठबन्धनमा रहँदा १० सिट जित निकाल्दा समानुपातिकमा राष्ट्रिय दलको मान्यता पाउने थ्रेस होल्ड मत कटाउन सकेको थिएन।

यसले कुल मतपत्रमा ३ प्रतिशतको न्यूनतम थ्रेसहोल्ड पुरा गर्न नसकेका कारण पार्टीले समानुपातिक प्रणालीमार्फत कुनै सिट प्राप्त गर्न सकेन।

एकीकृत समाजवादीले ०७९ को निर्वाचनमा समानुपातिकमा २ लाख ९८ हजार ३९१ मात्र पायो। जुन कुल मतपत्रमा लगभग १.८ प्रतिशत भाग थियो र यो ३ प्रतिशतको कटअफभन्दा तल परेको हुँदा यसले समानुपातिकतर्फ सिट पाउन नसकेको हो भने राष्ट्रिय दलको मान्यता पाएन।

‘अहिले त झनै संगठनका नेताहरु एमाले फर्किने र कतिपय जिल्लामा त कमिटी नै बिलय हुने क्रम बढेका कारण यसलाई अब क्लब भन्दा हुन्छ’, विश्लेषकहरु भन्छन्।

कतिपय एमाले नेता कार्यकर्ता भने  पार्टीबाट हुत्याइएका, लखेटिएका बृद्धहरुको क्लव समेत भनेर खिसि गरिरेका पाइन्छ। तर, एकीकृत समाजवादीकै नेताहरु भने कम्युनिस्टको मूलधार भएको दाबी गर्छन्। 

उक्त पार्टी कालान्तरमा माओवादीसँग एकीकरण गर्ने तयारीमा रहेको बताइएको छ। तर गर्ने या नगर्ने भन्ने निधो हुन सकेको छैन।