काठमाडौँ– नेकपा एमालेका महासचिव शंकर पोखरेललाई रुपन्देही–१ बाट चुनाव लडाउने तयारी भएको छ । 

दाङ–२ बाट चुनाव हारेका पोखरेललाई प्रतिनिधिसभामा लैजान एमाले अध्यक्ष केपी शर्मा ओलीले नै चासोपूर्वक वातावरण बनाइरहेको एमालेका नेताहरूले जानकारी दिए । 

रुपन्देही–१ खाली गराउने र त्यहाँ हुने उपचुनावमा पोखरेललाई उम्मेदवार बनाएर प्रतिनिधिसभामा लैजाने ओलीको चाहना रहेको एमालेका नेताहरू बताउँछन् ।

अहिले रुपन्देही–१ बाट एमालेका सचिव छविलाल विश्वकर्माले चुनाव जितेका छन् । प्रतिनिधिसभाको सभामुखमा विश्वकर्माको नाम चर्चा आएको थियो । 

उनलाई सभामुख बनाउँदा रुपन्देही–१ खाली नहुने र पोखेरेललाई चुनाव जिताउन सम्भव नहुने देखेपछि ओलीले विश्वकर्मालाई ब्याक गराएको एमालेका नेताहरू बताउँछन् ।  

एमाले अध्यक्ष ओलीले भने विश्वकर्मालाई राष्ट्रपतिको उम्मेदवार बनाउन चाहेको एमाले स्रोत बताउँछ ।

‘एमालेको उम्मेदवार राष्ट्रपति बन्ने अवस्थामा ओलीले विश्वकर्मालाई अघि सार्छन् । त्यसो हुँदा ओलीले चाहेजस्तो हुन्छ । विश्वकर्मा राष्ट्रपति बन्छन् । पोखेरेल सांसद बन्छन्’, एमाले स्थायी कमिटी सदस्य रहेका एक नेताले भने ।

ओलीले यसअघि दाङ–२ नै खाली गराएर पोखरेललाई चुनाव लडाउने प्रयास गरेका थिए । तर, दाङ–२ बाट चुनाव जितेकी माओवादी नेतृ रेखा शर्मा राजीनामा दिन तयार नभएपछि ओलीको प्रयास विफल भएको थियो । 

पुस १० मा माओवादी अध्यक्ष पुष्पकमल दाहाल प्रचण्ड प्रधानमन्त्री नियुक्त भएको केही दिनपछि ओलीले प्रचण्डसँग रेखालाई उपराष्ट्रपति बनाएर दाङ–२ खाली गराउन प्रस्ताव गरेका थिए ।

प्रचण्डले पनि ओलीको प्रस्तावमा सहमति जनाएर शर्मासँग कुरा गरेका थिए । तर, शर्माले भने जनताले आफूलाई उपराष्ट्रपति बन्नका लागि जिताएर पठाएको नभई दाङ–२ को विकास र समृद्धिमा योगदानको आस गरेको जबाफ दिएकी थिइन् । 

प्रचण्डसँग कुरा भएको केही दिनमा ओलीसँग भेटेर पनि शर्माले सोही कुरा दोहो¥याएपछि दाङ–२ खाली गराउने योजना विफल भएको थियो । शर्मा अहिले सूचना तथा सञ्चार प्रविधि मन्त्री छिन् । 

दाङ–२ खाली गराउँदा पोखरेलको आफ्नै निर्वाचन क्षेत्र भएकाले जिताउन सहज हुने ओलीको विश्वास थियो । पोखरेल पनि दाङ–२ बाटै निर्वाचित हुन चाहन्थे । 

अहिले भने रुपन्देही–१ खाली हुँदा पनि जिताउन सकिने भन्दै ओलीले त्यसको प्रयास गरिरहेको एमालेका एक स्थायी कमिटी सदस्यले बताए । 

पोखरेललाई चुनाव जिताउन सहयोग पुग्ने देखेर नै ओलीले राष्ट्रिय स्वतन्त्र पार्टीलाई पनि काखी च्यापेको ती नेताले सुनाए । 

‘पोखरेल लुम्बिनी प्रदेशको मुख्यमन्त्री भएका व्यक्ति हुन् । पार्टीले उम्मेदवार बनाएर लैजाँदा कार्यकर्ताको भोट त आइहाल्छ । तर, जनताको भोट भने नआउन सक्छ । लुम्बिनीको राजधानी बुटवलबाट दाङ लगेको भन्दै उनीसँग जनता असन्तुष्ट छन् । त्यसलाई व्यवस्थापन गर्न राष्ट्रिय स्वतन्त्र पार्टीको सहयोग लिन सकिन्छ भन्ने विश्लेषण छ’, ती नेताले भने । 

रुपन्देहीमा राष्ट्रिय स्वतन्त्र पार्टीले राम्रो मत ल्याएको थियो । उक्त पार्टीका सभापति रवि लामिछानेलाई नै चुनावमा प्रयोग गर्न सकिने भएपछि भोट बढाउन मद्दत पुग्ने विश्लेषण गरेपछि पोखरेल पनि रुपन्देही–१ मा उम्मेदवार हुन तयार भएको ती नेताले बताए । 

राष्ट्रिय स्वतन्त्र पार्टीका लामिछानेको पनि सांसद पनि गुमेको छ । चितवन–२ मा उपचुनाव गर्नुपर्ने छ । 

त्यही समयमा रुपन्देही–१ मा पनि उपचुनाव गराई लामिछाने र पोखरेललाई एकै पटक निर्वाचित गराउने रणनीतिमा एमाले अध्यक्ष ओली रहेको ती नेताले बताए ।