काठमाडौँ– सरकारको नेतृत्व गरिरहेको दल नेकपा माओवादी केन्द्रले आफ्नो भागमा परेको भनिएको उपराष्ट्रपति पद छाडेको छ ।

सत्ता भागबन्डामा माओवादीले प्रधानमन्त्री र उपराष्ट्रपति पद पाएको भनिए पनि अहिले आएर माओवादीले उपराष्ट्रपति पद छाडेको हो ।

सत्ता साझेदार दल जनता समाजवादी पार्टी (जसपा) ले उपराष्ट्रपति पद आफूले पाउनैपर्ने अडान लिएपछि माओवादी केन्द्र सो पद छोड्न तयार भएको स्रोतले जानकारी दिएको छ ।

एमाले अध्यक्ष केपी शर्मा ओली र माओवादी केन्द्रका अध्यक्ष तथा प्रधानमन्त्री पुष्पकमल दाहाल ‘प्रचण्ड’बीच उपराष्ट्रपति पद जसपालाई दिने सहमति भइसकेको स्रोतको दाबी छ ।

‘उपराष्ट्रपति पद जसपालाई नदिँदा धेरै कुरामा गडबड हुने भयो, प्रचण्डलाई प्रधानमन्त्री पद जोगाउनुपर्ने र ओलीलाई सत्ता गठबन्धन जोगाएर राष्ट्रपति पद पनि आफैँले लिनुपर्ने बाध्यताका कारण जसपाले उपराष्ट्रपति पद पाउने अवस्था सिर्जना भएको हो,’स्रोतले सिएन नेपालसँग भन्यो ।

प्रधानमन्त्री प्रचण्ड र एमाले अध्यक्ष ओलीबीच जसपालाई उपराष्ट्रपति पद दिने सहमति भइसकेको स्रोतको दाबी छ ।

ओली र प्रचण्डबीच जसपालाई उपराष्ट्रपति पद दिने सहमति भएसँगै मधेस प्रदेशमा सरकार गठनले गति लिने स्रोतको दाबी छ ।

मधेसमा जसपा प्रदेश संसदीय दलका नेता सरोजकुमार यादव मुख्यमन्त्री बनेका छन् । तर, केन्द्रमा कुरा नमिल्दा उनले सरकारलाई पूर्णता दिन सकिरहेका छैनन् ।

जसपा भने आन्तरिक रूपमा उपराष्ट्रपतिको उम्मेदवारको खोजीमा लागेको छ । जसपा संसदीय दलका नेता रामसहाय यादवलाई उपराष्ट्रपतिका रूपमा अघि सार्ने गृहकार्य जसपा अध्यक्ष उपेन्द्र यादवले थालेका छन् ।

यादवलाई उपराष्ट्रपति बनाउन सकिएको अवस्थामा आफूलाई प्रतिनिधिसभामा छिर्ने बाटो खुला हुन सक्ने आकलन पार्टी अध्यक्ष यादवको छ ।

जसपा सांसद रामसहाय यादव पार्टी संसदीय दलका नेता पनि हुन् । उनी बारा– २ बाट प्रतिनिधिसभामा निर्वाचित भएका छन् । उनलाई उपराष्ट्रपति बनाएपछि सो क्षेत्र रिक्त हुने र पार्टी अध्यक्ष यादवले सोही क्षेत्रबाट चुनाव लड्ने योजना बनाइएको स्रोतको दाबी छ ।