काठमाडौँ– उपप्रधान तथा अर्थमन्त्री विष्णु पौडेलको नेतृत्वमा सरकारमा गएका एमालेका अन्य ३ मन्त्री कामविहीन भएका छन् ।
एमालेबाट २ साताअघि नै मन्त्री भएका दामोदर भण्डारी, ज्वालाकुमारी साह र राजेन्द्र राईको मन्त्रालय तोकिएको छैन । जसका कारण उनीहरू अहिले कामविहीन भएका हुन् ।
बिनाविभागीय मन्त्रीहरू बिहान १० बजेपछि सिहंदरबार पुगेर बेलुका ५ बजेतिर मन्त्री क्वार्टर फर्किने गरेका छन् ।
३ दिनअघि मन्त्री क्वार्टर पुलचोक सरेका तीनै जना मन्त्रीले आधिकारिक मन्त्रालय नपाएपछि उनीहरू कामविहीन बस्नुपरेको गुनासो गरेका छन् ।
मन्त्रालय नतोकिएका उनीहरू सिहंदरबारस्थित एमाले ससंदीय दलको कार्यालयमा बसेर दिन बिताउने गरेका छन् ।
पार्टीले मन्त्री बनाएर पठाए पनि मन्त्रालयको जिम्मेवार नपाएका कारण कामविहीन भएर बस्नुपरेको क्यानडा नेपालसँग कुराकानी गर्दै धनकुटाका सांसद्समेत रहेका मन्त्री राजेन्द्र राईले जानकारी दिए ।
मन्त्रालय तोकिएको भए आफ्नो काम अघि बढाउन सहज हुने भए पनि बिनाविभागीय भएपछि यत्तिकै बस्नुपरेको उनले बताए ।
‘अहिले सिहंदरबार आउने काम मात्र भएको छ । अब केही दिनमा मन्त्रालयको जिम्मेवारी पाइन्छ होला । त्यसपछि काम गर्नुपर्छ’, उनले भने, ‘मन्त्रालयको जिम्मेवारी नपाएपछि यस्तै हो । अब केही दिन सिंहदरबार आउने–जाने मात्र होला जस्तो छ ।’
अहिले पार्टीका सांसद, कार्यकर्ता र नेताहरूसँग समसामयिक विषयमा छलफल गर्ने गरेको उनको भनाइ छ ।
यस्तै, एमाले सुदूरपश्चिम प्रदेश कमिटीका अध्यक्षसमेत रहेका मन्त्री पाण्डे पनि दिनभर संसदीय दलको कार्यालयमा अन्य सांसद र पार्टीका कार्यकर्तासँग भेटघाटमा व्यस्त हुने गरेका छन् ।
मन्त्रालय नपाएपछि अहिले साथीभाइ, संसद् र कार्यकर्तासँग भेटघाट गरी दिन बित्ने गरेको उनले जानकारी दिए ।
पाण्डे र राईजस्तै मन्त्री साह पनि सिंहदरबारस्थित एमालेको संसदीय दलको कार्यालयमै दिन काट्ने गरेकी छिन् । उनी पनि दिनभर पार्टीका कार्यकर्ता र साथीभाइसँग छलफल गरेर बेलुका मन्त्री क्वार्टर फर्किने गरेको बताउँछिन् ।
माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्री नियुक्त भएको १ साता भएको छ । उनी प्रधानमन्त्री भएको दिन तीनै जनालाई एमालेले मन्त्री बनाएर पठाएको थियो ।
प्रचण्ड नेतृत्वको सरकारलाई एमाले, माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनमत पार्टी, नागरिक उन्मुक्ति पार्टी र जसपाको साथ छ । त्यस्तै, स्वतन्त्र सांसदहरू प्रभु साह, किरणकुमार साह र डा. अमरेशकुमार सिंहले पनि सरकारलाई समर्थन गरेका छन् ।
