ठेक्का तोड्दा तेब्बरले बढ्यो भैरव स्थानको भेटी

काठमाडौँ । सरकारले सय पर्यटकीय तथा धार्मिक क्षेत्रका रूपमा सूचीकृत बागलुङको कालभैरव मन्दिरमा गुठी व्यवस्थापन समिति सक्रिय भएपछि भौतिक पूर्वाधार निर्माणसँगै आम्दानीमा वृद्धि भएको छ। धार्मिक शिक्तपीठमध्येको एक बागलुङ बलेवा कालभैरव मन्दिरमा भेटी संकलन तेब्बरले वृद्धि भएको छ।

धार्मिक पर्यटक भित्र्याउँदै आएको बागलुङ नगरपालिका-१२ स्थित कालभैरव मन्दिरमा २०७९ सालमा ६ वर्षपछि गुठी व्यवस्थापन समिति सक्रिय भएपछि पूर्वाधार निर्माणले तीव्रता पाएसँगै यहाँ आउने दर्शनार्थीको सङ्ख्यामा वृद्धि भएको छ।

दर्शनार्थीको सङ्ख्यामा वृद्धि भएपछि भेटी संकलन दरसमेत तेब्बरले वृद्धि भएको छ। समितिमार्फत पूजा चलाउन थालेको एक वर्ष भएको बताउँदै भैरव स्थान मन्दिर गुठी व्यवस्थापन समितिका अध्यक्ष ज्ञानेन्द्रराज ढकालले आम्दानी तेब्बरले वृद्धि भएको बताए।

मालपोत कार्यालय बागलुङद्वारा ठेक्कामा भेटी संकलन गरिँदै आएकामा आर्थिक वर्ष २०८१र०८२ मा गुठी व्यवस्थापन समितिले जिम्मा लिएपछि भेटी संकलन तेब्बरले वृद्धि भएको हो।

‘आव २०८०/८१ मा ठेक्कामार्फत रु. नौ लाख आम्दानी भएकामा समितिमार्फत पूजा चलाउँदा रु. २७ लाख आम्दानी भएको छ, ठेकेदारले नाफा कमाउँदा मन्दिर अस्तव्यस्त भएकाले समितिमार्फत पूजा चलाउने र आम्दानीले भौतिक संरचना र दर्शनार्थीको सुविधा थप गर्ने हाम्रो उद्देश्य छ ।’ अध्यक्ष ढकालले भने, ‘कोरोना महामारीमा रु. ५० हजार भेटी संकलन भएको मन्दिरमा अहिले रु. २७ लाख संकलन भएको र आगामी वर्ष संकलन अझै बढ्ने अपेक्षा छ।’

पछिल्लो दुई वर्षयता बलेवा कालभैरवको पूर्वाधारमा सत्तल, सचिवालय, प्रवेशद्वार, पदमार्ग, खानेपानी, शौचालयलगायत पूर्वाधारमा रु. ८० लाखभन्दा बढी रकम खर्च भइसकेको ढकालले जानकारी दिए।

समिति, संघीय सरकार, गण्डकी प्रदेश सरकार र बागलुङ नगरपालिकाबाट पूर्वाधार निर्माणमा सहयोग भएको समितिका कोषाध्यक्ष चन्द्र केसीले जानकारी दिए। उनले अघिल्लो व्यवस्थापन समितिले बनाएको गुरुयोजना, हिसाब किताब नपाएको र समिति नहुँदा मन्दिरको अवस्था बिग्रिएकाले यो वर्षदेखि आय वय सार्वजनिक तथा लेखा परीक्षण गराउँदै आएको बताए।

समितिको आन्तरिक रकमबाट ११ वटा व्यावसायिक सटर निर्माण गरेपछि आगामी वर्षबाट मन्दिरको मासिक आम्दानीसमेत भइरहेको छ। अहिले मासिक ३० हजारमा सटर भाडामा लगाइएको छ।

 समुद्री सतहबाट एक हजार ४०० मिटरको उचाइमा रहेको भैरव स्थानको मुख्य मन्दिर भने पुरानो छ। भैरव स्थान मन्दिर गुठी व्यवस्थापन समिति सक्रिय भएसँगै कालभैरव मन्दिरमा पूर्वाधार निर्माणले गति लिएको छ भने वर्षौँदेखिको ठेक्का तोडेर समितिले आम्दानी लिन थालेको छ।

तीन सय वर्षभन्दा पुरानो मन्दिरमा पछिल्लो समय सडक सुविधा पुगेपछि धार्मिक पर्यटकमा वृद्धि भएको छ। बागलुङ नगरपालिका-१२ अमला चौरमा रहेको कालभैरव मन्दिर भकुण्डे र रायडाँडासँग सिमाना जोडिएको छ।

कालभैरव मन्दिरको प्रचारप्रसार र महिमाका कारण पछिल्लो समय आन्तरिक पर्यटक बढेपछि सडक स्तरोन्नति, पदमार्ग, व्यावसायिक सटर, सक्तललगायत पूर्वाधार थपिँदा मन्दिरमा पुग्ने दर्शनार्थीको चाप बढेपछि भेटी संकलनसमेत बढिरहेको ढकालको भनाइ छ।

विसं १७८० तिर पाल्पाबाट ल्याइएका कालभैरवलाई यहाँ स्थापना गरिएको किंवदन्ती छ। मन्दिरमा मंगलबार र शनिबार विशेष पूजा हुने गर्दछ भने दसैँ र चैते दसैँमा मन्दिरमा दर्शनार्थीको बढी भीड लाग्ने गरेको पाइन्छ।

पाल्पाका राजा मणिमुकुन्द सेनका पालामा दाजुभाइमाझ झगडा परेपछि एक भाइ छुट्टिएर बलेवामा आएको र भैरवलाई पनि छुट्याएर यहीँ ल्याएर स्थापना गरेको विश्वास गरिन्छ। मनोकांक्षापूरा हुने जनविश्वासका कारण पछिल्लो समय मन्दिरमा दर्शनार्थीको सङ्ख्यामा बढ्दै गइरहेको छ।