‘फासिस्ट’ बाटोमा ओलीः उमेरसीमा राखेर भरतमोहनलाई लखेटेका थिए, हटाए पनि भण्डारीलाई छेकिदिए

काठमाडौं– दिउँसो भंगालबाट पूर्वराष्ट्रपति विद्यादेवी भण्डारीले एमालेमा सक्रिय राजनीति गर्न नझुक्ने, नरोकिने र अगाडि बढ्ने घोषणा गरेपछि मध्यराती केन्द्रीय समितिको बैठकमा अध्यक्ष केपी शर्मा ओलीले ‘फासिस्ट’ निर्णय सुनाए, लामो प्रवचनसँगै।

प्रतिस्पर्धाबाट श्रेष्ठता भन्ने जनताको बहुदलीय जनवाद (जबज)को जीवित उत्तराधिकारी भण्डारी राष्ट्रपति बनिसकेको कारण ‘सम्मान र विधि’को राजनीतिका नाममा पार्टी सदस्यता नविकरण नगर्ने, सक्रिय हुन नदिने ओलीको जबरजस्त प्रवचनपछि केन्द्रीय समितिको बैठकबाट अनुमोदन भएको घोषणा गरियो। 

उपाध्यक्ष सुरेन्द्र पाण्डे, युवराज ज्ञवाली र स्थायी कमिटी सदस्य कर्णबहादुर थापालाई बोल्न दिइएन भने कुनै पनि ‘आर्गुमेन्ट’ नसुनी एमाले केन्द्रीय समितिबाट ओलीको फासिस्ट शैलीको निर्णय अनुमोदन गराइयो।

यसले अब एमालेभित्र भयानक विवादको बिजारोपण गरेको छ भने सहकर्मी लखेट्दै गएका ओलीले पार्टीलाई बाँचुञ्जेल नेतृत्वमा रहने महत्वकांक्षाको अर्को निर्णय पनि गराए– ७० बर्षको उमेरसीमा नरहने, दुई कार्यबालभन्दा बढी पनि नेतृत्व गर्न पाइने।

जबकि यो विधि ओलीको प्रस्तावका आधारमा एमाले आठौं महाधिवेशनमा पारित भएको थियो। त्यसपछि निरन्तर कार्यान्वयनमा जाँदा पूर्वउपप्रधान तथा सफल अर्थमन्त्री भरतमोहन अधिकारीले समयमा नै राजनीतिबाट विश्राम लिनु परेको थियो। एक हिसाबले मनमोहन अधिकारीको उत्तराधिकारीका रुपमा रहेका भरतमोहनलाई लखेट्नका लागि नै यो उमेरसीमाको विधि ल्याइएको थियो भने अहिले ओलीलाई कायम राख्न हटाइएको हो।

एमाले पोलिटब्यूरो सदस्य महेश बस्नेतले भनेका छन्,‘११औं महाधिवेशनमा ओलीको नेतृत्वमा नै पार्टी अघि बढाउनका लागि हटाइएको हो। यसमा सिधा कुरा यहि हो।’

ओलीले यो हटाउनका लागि नै बामदेव गौतमसँग गरेको सहकार्य कार्यान्वयन गरेका थिएनन्। ७० को उमेर सीमा हद हटाएर बामदेव गौतमलाई पार्टीमा ल्याउँदा प्रतिस्पर्धी बढ्ने खतरा ओलीले देखेका थिए। 

आगामी महाधिवेशनमा ओलीसँग प्रतिस्पर्धा गर्नका लागि बरिष्ठ उपाध्यक्ष ईश्वर पोखरेलको बाटो खुले पनि फासिस्ट शैलीमा चलेका ओलीका निम्ति त्यो सहज देखिरहेको पनि अनुमान गरिएको छ।

यो गुण ओलीले निरन्तर देखाउन थालेका छन्। पछिल्लो चरणमा भण्डारीको राजनीतिक सक्रियताको सवाल आएपछि अझ बढी देखाए।

यसमा एउटा बलियो नेता वा सर्वोच्च नेताको पूजा गरिन्छ। उसलाई राष्ट्रको प्रतिनिधि र मुक्तिदाता ठानिने जस्तो ओली प्रवृत्ति सचिवालय, पोलिटब्यूरो र केन्द्रीय समितिमा पनि जबरजस्त हावी बनाइयो।

आफ्नै राष्ट्र, जाति वा संस्कृतिलाई अरुभन्दा उच्च ठानिन्छ। अन्य जाति, धर्म वा समूहलाई खलनायक बनाउने प्रवृत्तिमा ओली अगाडि बढे। यसका लागि प्रचार विभाग प्रमुख राजेन्द्र गौतमले पूर्वराष्ट्रपति डा. रामवरण यादवको उदाहरण पेश गरेका थिए। उनले भने,‘नेपाली सेनाको परमाधिपति समेत भैसकेका कारण उहाँलाई सम्मानित भएर बस्नका लागि भनिएको हो, उहाँ सक्रिय राजनीतिमा आउन हुन्न।’

तैपनि भण्डारीले दिउँसो नै आफू माझ किराँतको छोरी भएका कारण नरोकिने घोषणा गरेकी छन्। यसले अब ओलीको शैलीविरुद्ध एमालेमा अर्को शक्ति आक्रामक बन्न सक्ने पनि संकेत गरेको छ।

भण्डारी निकट एक नेता भन्छन्,‘उहाँको पनि केही घोषणा तयारी साथ आउन सक्छ। अहिले केन्द्रीय समितिको निर्णयको अध्ययन भैरहेको छ। चाँडै केही हुन्छ।’