नगरकोटमा ज्ञानेन्द्रलाई भेट्नेको लामै छ लिष्ट, पत्रकारदेखि पूर्वजर्नेल समेत पुगेका थिए

काठमाडौं– राजसंस्थावादी आन्दोलन घोषणा भैसकेको स्थितिमा नगरकोटमा झन्डै दुई साता लामो समय बिताएका ज्ञानेन्द्र शाहसँग अनेक क्षेत्रका मानिसको भेट भएको छ।

१२ दिनसम्म बसेका उनले १२ थरी मानिससँग भेट गरी हिन्दूत्व र राजनीतिक स्थितिको बारेमा जानकारी लिएका हुन्। उनी सात जना परिवारका सदस्य, निजी र सरकारी सुरक्षाकर्मीको टोलीसहित नगरकोटमा बसेका थिए।

ज्ञानेन्द्रले वैशाख १९ गतेबाहेक वैशाख २६ गतेसम्म राजनीतिक भेटघाट र छलफल नै गरे। सो क्रममा राजावादी आन्दोलन समितिका संयोजक, पत्रकारहरुदेखि नेपाली सेनाका पूर्वजर्नेलसम्मले भेट गरेको उच्च स्रोतले क्यानडानेपाललाई जानकारी दियो।

वैशाख १९ गते उनको विवाह वर्षगाँठ भएकाले उनले त्यस दिन राजनीतिक संवाद नगरे पनि अन्य दिन विभिन्न विधाका मानिसलाई भेट गरेका हुन्। 

वैशाख २३ गतेसम्मको अवधिमा भने उनले राप्रपा अध्यक्ष राजेन्द्र लिङ्देन, राप्रपा नेपालका अध्यक्ष कमल थापा, राजसंस्था पुनस्र्थापनाका लागि संयुक्त जनआन्दोलन समितिका संयोजक नवराज सुवेदी, पत्रकार भूषण दाहाल, एभिन्युज टेलिभिजनका प्रमुख भाष्करराज राजकर्णिकार, संयुक्त जनआन्दोलन समिति’ का सल्लाहकार जगमान गुरूङ, नेपाली सेनाका पूर्वजर्नेल प्रेमसिंह बस्नेतलगायतसँग शाहको भेट र कुराकानी भयो। 

त्यसक्रममा उनले राप्रपाका सहमहामन्त्री रवीन्द्रप्रताप शाहसँग पनि भेटघाट गरेका थिए। नगरकोट बसाइका क्रममा उनले सहमहामन्त्री शाहसँग ज्यादा भेटघाट गर्न भ्याए। 

राप्रपा सांसद दीपक सिंहसँग भेटघाट गर्नुका साथै काभ्रेपलाञ्चोक मण्डन देउपुर नगरपालिकामा हिमानी ट्रष्टको नाममा रहेको ४२ रोपनी जग्गासमेत निरीक्षण गरेका थिए।

चैत १५ पछिको परिदृश्यमा राजावादीहरू प्रायः एकै मञ्चमा देखिन थालेका छन्। वैशाख १५ गते रत्नपार्कको शान्तिवाटिकामा कमल थापा नेतृत्वको राप्रपा नेपालले आयोजना गरेको कार्यक्रममा राप्रपा अध्यक्ष राजेन्द्र लिङ्देनदेखि केशरबहादुर विष्टसम्म सँगै देखिएका थिए।