बुलबुले होटलमा सहमतिमा कोइराला–चन्द सहबासः ख्याल ख्यालमै गयो १४ लाख, अहिले हारगुहार

काठमाडौं– जिल्ला प्रहरी कार्यालय सुर्खेतले अहिले एक जना महिलालाई हनि ट्रयापमा पारेको अभियोगमा पक्राउ गरी छानबिन जारी राखेको छ।

प्रहरीका अनुसार शिन्दु चन्द नाम गरेकी महिलाले मनोज कोइराला नामका युवकलाई सुर्खेत वीरेन्द्रनगर–१६ स्थित बुलबुले भ्यु होटलमा बोलाएर सहमतिमा सहबास गरेका थिए। 

तर चन्दले कोइरालालाई हनिट्रयापमा पारी १४ लाख २५ हजार लगेपछि हारगुहार गर्दै प्रहरीसमक्ष उजुरी दिनु परेको थियो। 

‘आर्थिक लाभ लिने मनसायले जबरजस्ती करणी मुद्दामा फसाईँ दिन्छु र सामाजिक सञ्जाल तथा मिडियामा नाङ्गो फोटो राखिदिन्छु भनी डर त्रास देखाएर बेइमानीपूर्वक परिस्थिति खडा गरी विभिन्न मितिमा उक्त रकम नगद लगेको भेटियो’ सुर्खेत प्रहरी प्रवक्ता र्डीसपी मोहनजंग बुढथापाले भनेका छन्।

उजुरी परेपछि दैलेख नौमुले गाउँपालिका–८ घर भएकी वीरेन्द्रनगर–९ बस्ने २१ बर्षीया चन्दलाई पक्राउ गरी आर्थिक लाभ लिएको कसुरमा अनुसन्धान जारी रहेको प्रहरीले जनाएको छ।