ओली काठमाडौं आउनासाथ सामान्य प्रशासन मन्त्री राजकुमार गुप्ता फायर

काठमाडौं । घुसको डिल गरेको  दाबीसहित अडियो सार्वजनिक भएपछि संघीय मामला तथा सामान्य प्रशासनमन्त्री राजकुमार गुप्तालाई हटाउने तयारी भएको छ ।

उच्च स्रोतका अनुसार प्रधानमन्त्री केपी शर्मा ओली काठमाडौं फर्किएर यसबारे निर्णय लिनेछन् । ‘प्रधानमन्त्री पूर्वतिर हुँदा यता यस्तो भयो, उहाँ फर्किएपछि यसबारे निर्णय लिने तयारी छ,’ स्रोतले भन्यो ।

स्रोतका अनुसार मन्त्री गुप्तालाई राजीनामा गराउने अथवा उनलाई बर्खास्तको निर्णय हुनेछ । ‘राजीनामा गर्न नै भनिन्छ । त्यो नै उत्तम विकल्प हो’ स्रोत भन्छ, ‘नभए बर्खास्तकै निर्णय गर्नुपर्ने हुन्छ ।’

सार्वजनिक भएको अडियोमा अर्का मन्त्री बलराम अधिकारीलाई पनि घुस लिएको आरोप मन्त्री गुप्ताले लगाएका छन् । तर भूमि व्यवस्था, सहकारी तथा गरिबी निवारणमन्त्री अधिकारीलाई भने यही आरोपकै तत्काल कुनै निर्णय नलिने सम्भावना छ ।

‘पहिलो कुरा त मन्त्री गुप्ताकै कुरा पनि पुष्टि हुन बाँकी छ । अब उनले भन्यो भन्दैमा तत्काल अर्को मन्त्रीलाई एक्सन लिने हुँदैन,’ स्रोत भन्छ ।

काठमाडौं मालपोत कार्यालय कास्कीका प्रमुखको सरुवा रोक्न ५३ लाख र भूमि आयोग कास्कीको अध्यक्ष बनाउन खेमबहादुर पुनसँग २५ लाख रकम डिल गरेको दाबीसहितको अडियो सार्वजनिक भएसँगै संघीय मामिला तथा सामान्य प्रशासनमन्त्री राजकुमार गुप्तामाथि चौतर्फी दबाब बढेको छ। 

तर गुप्ताले भने घुस काण्डबारेको अडियोमाथि छानबिन गर्न माग गरेका छन् । फसाउने षड्यन्त्रका साथ कसैले आफूमाथि घुसकाण्ड रचेको उनको दाबी छ । मन्त्री गुप्ताले आफूमाथि प्रश्न उठेकाले पार्टीले निर्देशन दिएमा मन्त्री पदबाट राजीनामा दिन तयार रहेको बताए । 

गुप्ताको घुस डिलको अडियो सार्वजनिक भएपछि संसद देखि राजनिति वृत्तमा चर्को आलोचना भइरहेको छ ।

कतिपय सांसदहरूले यसबारे प्रधानमन्त्री केपी शर्मा ओलीले नै जवाफ दिनुपर्ने माग राखेका छन् । मालपोत कार्यालय प्रमुखको सरुवा आफै रोक्ने र भूमि व्यवस्था, सहकारी तथा गरिबी निवारणमन्त्री बलराम अधिकारीमार्फत भूमि आयोग कास्कीको अध्यक्ष बनाउने भन्दै मन्त्री गुप्ताले ‘डिल’ गरेको अडियो सार्वजनिक भएको थियो । 

सरकारले भने यसबारे अहिलेसम्म कुनै धारणा सार्वजनिक गरेको छैन । गुप्ता प्रधानमन्त्री केपी ओलीकै दल एमालेका नेता हुन् । स्मरणीय छ, ओलीले यसअघि २०७४ सालमा प्रधानमन्त्री भएको बेलामा विवादमा तानिँदा दुई मन्त्रीलाई हटाएका थिए ।

एउटा घूस बार्गेनिङ भएको अडियो थियो भने अर्को सार्वजनिक कार्यक्रममा बोल्दा जिब्रो चिप्लिएको थियो । अब  सोमवार बस्ने मन्त्रीपरिषद बैठकले गुप्ताको पद हेरफेर हुनेसक्ने सम्भावना देखिएको स्रोतले जनाएको छ।