‘माग्ने राजा’ टिजरको प्रतिक्रियाले केदार घिमिरे उत्साहित
काठमाडौं- अभिनेता केदार घिमिरेले 'माग्ने राजा' टिजरको प्रतिक्रियाले उत्साहित बनाएको प्रतिक्रिया दिएका छन् ।
सिनेमाकर्मी र दर्शकबाट प्रशंसा पाएका उनले टिजरले अपेक्षित प्रतिक्रिया पाएकोमा प्रशन्नता व्यक्त गरेका छन् । उनले सिनेमाका बाँकी प्रचार सामाग्रीले पनि सोही अनुसारको माया पाउने विश्वास व्यक्त गरे ।
'टिजरमा आएको दर्शकको प्रतिक्रियाले निर्माण टिम खुसी छौँ । मलाई नयाँ स्वरुपमा हेर्न खोज्नु भएको प्रतिक्रियालाई पनि हामीले सकारात्मक रुपमा लिएका छौं,' घिमिरेको भनाइ छ, ‘तर 'माग्ने राजा'को चरित्र माग्नेकै निरन्तरता स्वरुप निर्माण भएकाले यसमा पुरानो माग्नेका लवज र थेगो प्रयोगमा आएका छन् । तर सिनेमामा नयाँ माग्ने पनि देख्न सक्नुहुनेछ ।'
तीन दिनमा करिब १० लाख भ्युज पाएको टिजरका संवादलाई दर्शकले रुचाएका छन् । त्यसैगरी टिजरमा देखिएको प्रडक्सन भ्यालुले पनि दर्शकलाई सन्तुष्ट बनाएको छ । निर्देशक ऋषि लामिछाने टिजरले तीन दिनमा नौ लाख ९३ हजार बढि दर्शक पाउनुलाई सिनेमाले कमाएको विश्वासको रुपमा ग्रहण गरेको बताए । निर्देशक लामिछानेका अनुसार सिनेमा हास्य विधामा निर्माण भएको र टिज गर्ने हिसाबले टिजरले सिनेमालाई लिएर कौतुहलता सिर्जना गर्न सकेको आभाष भएको बताए ।
‘टिजरको काम टिज गर्ने अर्थात् दर्शकलाई सिनेमाप्रति उत्सुक बनाउने हो । टिजरले त्यो गरेको छ । केदार घिमिरेलाई पहिलो पटक मुख्य भूमिकामा प्रस्तुत गर्ने चुनौती लिइरहँदा, दर्शकको स्वीकारोक्तिलाई लिएर दुविधाहरु थिए । तर टिजरमा आएको प्रतिक्रियाले हामी ढुक्क भएका छौँ,’ लामिछानेले भने ।
उनले पनि सिनेमाको मुख्य कथा माग्नेको चरित्र वरिपरि घुम्ने भएकाले प्रचार सामाग्रीमा उनकै चरित्रले स्थान पाउने बताए । ‘यो कथालाई माग्नेकै स्पिन अफ चरित्र भने पनि हुन्छ र हामीले घोषणादेखि नै यही कुरा भन्दै आएका छौँ । हामीले माग्नेलाई एउटा हास्यरसयुक्त कथासहित प्रस्तुत गर्ने प्रयास गरेका हौँ । यही अपेक्षाअनुसार सिनेमालाई हेर्नुभयो भने निराश हुनुपर्दैन,' लामिछानेले भने ।
आगामी भदौ ६ गतेबाट देशब्यापी प्रदर्शनमा आउने सिनेमाको टिजरले दर्शकमाझ राम्रो हाइप बनाउन सफल भएको छ । मुनाल घिमिरेको लगानीमा बनेको सिनेमामा केदार घिमिरेसँगै विल्सन विक्रम राई, वर्षा सिवाकोटी, शिशिर वाङदेल, शारदा गिरी आदि कलाकारको अभिनय रहेको छ । सिनेमालाई नरेन्द्र मैनालीले छायांकन गरेका हुन् ।
चलचित्र विकास बोर्डका ३३ सेवा अनलाइनबाट लिन सकिने
बयस्क फिल्मकी अभिनेत्रीको शंकास्पद मृत्यु, के हुन सक्छ कारण?
पाँच श्रेणीमा हुँदा रहेछन् सोसियल मिडिया इन्फ्लुएन्सर, सानोलाई भनिन्छ ‘नानो’
३१ र २५ बर्षअघि ‘मिस नेपाल’ जितेका थिए, अहिले पनि सक्रिय भेटिन्छन्
गायिका एलिना चौहानलाई गालीगलौज गर्ने गुञ्जनलाई प्रहरीले समात्यो, अन्यको खोजी जारी
बालेनले सेयर गरे पछि पशुपति शर्माको गीत 'ट्रेण्डिङ' मा
‘कट्टु नलगाएको’ टिप्पणीले ट्रोल भइन् खुशी, के दिइन् उत्तर?
