३१ र २५ बर्षअघि ‘मिस नेपाल’ जितेका थिए, अहिले पनि सक्रिय भेटिन्छन्

काठमाडौं– यी दुवै जना वीरगञ्जबाट काठमाडौं आए र बनेका थिए– मिस नेपाल।

ग्ल्यामरको दुनियाँमा छिरेका दुवै जनाको समान व्यवाहार र व्यापार पनि छ। बेलामौका पर्दामा देखिन्छन् अनि प्रायः सामाजिक सञ्जाल टिकटकमा आफ्नो व्यापारको प्रबद्र्धन गरिरहेको भेटिन्छन्। 

यी हुन्– पूर्वमिस नेपालद्वय रुबी राणा र उषा खड्गी।

रुवी राणा सन् १९९४ मा आयोजित पहिलो मिस नेपाल प्रतियोगिताको विजेता हुन्। उनलाई नेपालको सौन्दर्य प्रतियोगिताको इतिहासमा एक मीलको ढुंगा मानिन्छ। 

उनको जितले नेपाली समाजमा महिला सशक्तिकरण, सौन्दर्य प्रतियोगिता र ग्ल्यामर क्षेत्रको नयाँ युगको सुरुवात गरेको थियो।

उनी वीरगञ्जबाट काठमाडौं आएकी हुन्। कतिपय अन्तरवार्तामा उनले भनेकी पनि छन्।

मिस नेपालको उपाधि जितेपछि उनले विभिन्न सामाजिक कार्य, सञ्चार, र फेसन क्षेत्रमा आफ्नो पहिचान बनाइन्। उनका आत्मविश्वास, अनुशासन र शालीनताले उनलाई धेरै युवतीहरूको प्रेरणा बनायो।

त्यो समय सौन्दर्य प्रतियोगितालाई संकुचित दृष्टिकोणले हेरिन्थ्यो, तर रुवी राणाले यो प्लेटफर्मलाई सम्मानित र समाजपरक बनाउन भूमिका खेलेकी छन्। 

उनले नेपाली सञ्चार माध्यममा टेलिभिजन प्रस्तोता, कार्यक्रम सञ्चालिका र निर्णायकको रूपमा पनि काम गरेकी छन्।

उनको शालीनता, प्रस्तुतिमा आत्मविश्वास र नेतृत्वदक्षताका कारण उनी अहिले पनि मिस नेपाल प्रतियोगिताका निर्णायक वा अतिथि बनेर देखा पर्दै आएकी छन्।

अहिले उनी रुबी कलेक्शन भनी बुटिक चलाइरहेकी छन्, जसको प्रबद्र्धन गरिरहेको पाइन्छ। यसबाहेक सामाजिक सञ्जालमा उनका ग्ल्यामर नृत्य पनि देखिन्छ।

यस्तै, पूर्वमिस नेपाल उषा खड्गी नेपालको सौन्दर्य प्रतियोगिता र मनोरञ्जन क्षेत्रमा एक स्थापित अनुहार हुन्। 

उनलाई सन् २००० मा सातौँ मिस नेपालको उपाधि प्राप्त थियो, जसले उनलाई राष्ट्रिय स्तरमा मान्यता दिलाएको थियो। 

त्यही वर्ष उनी बेलायतमा हुन गइरहेको मिस वल्र्ड २००० मा प्रतिनिधित्व गरिन्, जसले उनको अन्तर्राष्ट्रिय परिचयलाई बलियो बनायो। 

खड्गीको प्रारम्भिक जीवन बिरगञ्जमा बित्यो। उनले सन् १९९९ मा मिस पोखरा र सन् २००० मा मिस बिरगञ्ज प्रतियोगितामा फस्ट रनर‑अप रहिन्, र त्यसपछि मिस नेपालको रौनक थपिन्। 

उपाधि जितेपछि उनी सौन्दर्य, स्वास्थ्य र आत्मविश्वासका प्रेरक प्रतीक बन्न पुगिन्।

उनले मोडलिङ, म्यूजिक भिडिओ तथा टेलिभिजन कार्यक्रममा काम गरिन्। केही चर्चित म्यूजिक भिडिओहरूमा उनको उपस्थिति रहेकै छ। 
हालसालै, उनले राजेश हमाल अभिनीत ‘नरसिंहा अवतार’ एक्सन फिल्ममा अभिनय गरिन्। 

उषा एक सफल व्यवसायी पनि हुन्। उनले २०१२ मा ललितपुर, कुपण्डोलमा उषा स्टाइलिस कलेक्शन नामक बुटिक खोलेकी छन् जसले आफ्नै डिजाइनका २०० भन्दा बढी पहिरनहरू प्रस्तुत गरेको छ। 

यसले नेपाली फेसन उद्योगमा उनको योगदानलाई प्रस्ट बनाउँछ।

विवाहबारे, उनले २००३ मा टेलिभिजन प्रस्तोता जीपी तिमिल्सिनासँग विवाह गरेकी थिइन्। तर २०२० मा संग्लग्न अतिगम्भीर मानसिक र शारीरिक दुव्र्यवहार अनुभव भएपछि, उनले १७ वर्ष लामो वैवाहिक जीवनलाई अन्त्य गरेको चर्चामा छ। 

उषा हाल विभिन्न टेलिभिजन कार्यक्रममा प्रस्तोता भएर सक्रिय छन्। सन् २०२२ देखि उनले ‘आमा’ नामक टक–शो प्रस्तुत गर्दै आमा–छोरी सम्बन्धमा आधारित भावनात्मक संवादहरू गर्दै आएकी छिन्।