दुई पटकको संसद् विघटन कसैको दबाबमा होइन, संवैधानिक व्यवस्थाअनुसार गरेँ : पूर्वराष्ट्रपति भण्डारी

पूर्वराष्ट्रपति विद्यादेवी भण्डारीले विगतमा कुनै दबाबमा परेर आफूले संसद् विघटन गर्ने मन्त्रिपरिषद्को निर्णय कार्यान्वयन नगरेको दाबी गरेकी छन्। सोमबार (आज) मदन भण्डारी फाउन्डेसनले काठमाडौंमा आयोजना गरेको पत्रकार भेटघाटमा बोल्दै भण्डारीले यस्तो दाबी गरेकी हुन्।

'संसद् विघटनको कुराले मलाई पछ्याइरहन्छ। ०१७ सालको कुरा पनि आइरहन्छ। त्यसपछि आएर ०५१ सालको कुरा पनि आइरहन्छ। त्यस्तै म राष्ट्रपति हुँदा दुईपटक संसद् विघटन भएका छन्, कुनै प्रेसर र दबाबभन्दा पनि मन्त्रिपरिषद्ले गरेको निर्णयलाई मैले कार्यान्वयन मात्रै गरेकी थिएँ। जे व्यवस्था छ, त्यहीअुनसार गरेकी थिएँ। त्यो दबाबको विषय थिएन, विधि र व्यस्थाअनुसार मन्त्रिपरिषद्को निर्णय मैले कार्यान्वयन गरेकी थिएँ,' उनले भनेकी छन्।

भण्डारी राष्ट्रपति हुँदा प्रधानमन्त्रीको हैसियतमा केपी शर्मा ओलीले दुईपटक संसद् विघटनको सिफारिस गरेका थिए। २०७७ पुस ५ र ०७८ जेठ ७ गते प्रधानमन्त्री ओलीले गरेको विघटनको प्रस्तावलाई भण्डारीले बिना विलम्ब कार्यान्वयन गरेकी थिइन्। त्यसको आलोचना पनि अहिले पनि बेला-बेला हुने गर्छ। एमाले उपाध्यक्ष पद त्यागेर राष्ट्रपति बनेकी भण्डारीको त्यसबेला एमाले र मुख्यत: ओलीअनुकूल काम गरेको भन्दै आलोचना भएको थियो।

भण्डारीले अहिले एमालेको सक्रिय राजनीतिमा फर्किएको घोषणा गरिसकेकी छन्। यसपछि उक्त विषय झनै उत्खनन् गरिँदैछ। यहीबेला भण्डारीले यसबारे थप प्रष्टोक्ति दिएकी हुन्।