एसपी खड्कालाई धम्क्याउने जसपा नेता यादव : यसअघि पनि प्रहरीलाई धम्की, मुद्दै मुद्दा

काठमाडौं– सर्लाहीका प्रहरी प्रमुख रहेका एसपी योगेन्द्रकुमार खड्कालाई धम्की दिने जनता समाजवादी पार्टी (जसपा)का मधेस प्रदेश अध्यक्ष अशोक यादव अहिले फरार रहेका छन्। 

अदालतले पक्राउ पूर्जी जारी गरी प्रहरी खोजीमा रहेका यादव सत्ता समर्थक अशोक राई नेतृत्वको जसपाका मधेस अध्यक्ष हुन्। 

उनी यो पहिलो पटक प्रहरीलाई धम्की दिनेमा पर्दैनन्। यसअघि पनि विभिन्न लफडा र धम्की दिएका मुद्दै मुद्दा उनीमाथि रहेको पनि खुलासा भएको छ।
प्रहरीलाई हातपात समेत गर्न खोजेको यसअघिको अर्को घटना पनि रहेको छ।

मधेसमा आफूले भनेको मात्र मान्नुपर्ने दादागिरी देखाउने उनले २९ कात्तिक ०७३ मा साबिकको सलेमपुर गाविसमा खटिएको प्रहरी टोलीलाई गालीगलौज गरी हातपात गर्न खोजेको अभियोग लाग्यो।

१३ साउन २०७३ मलंगवा नगरपालिका–४ स्थित सिंचाइ विकास डिभिजन कार्यालयमा अनधिकृत प्रवेश गरी कर्मचारीलाई गालीगलौज र धम्की दिएका थिए। 

‘लात, जुत्ताले हान्छु’ भन्दै धम्की दिएको भन्दै कार्यालयका प्रमुख मनोरञ्जन कुमार सिंहले जाहेरी दिएका थिए।

२७ जेठ २०७७ मा सर्लाहीको चक्रघट्टा गाउँपालिका–७ मा सडकको जग्गा विवाद हुँदा उनले स्थानीय राजनारायण रायमाथि निर्घात कुटपिट गरेका थिए। सो घटनामा ज्यान मार्ने उद्योगअन्तर्गत मुद्दा दर्ता भएको थियो।

५ पुस २०७२ मा सर्लाही प्रशासन कार्यालयको नागरिकता तथा राहदानी फाँटमा कम्प्युटर, प्रिन्टर र मोनिटर तोडफोड गरी सरकारी सम्पत्तिमा क्षति गरेको मुद्दा चलेको थियो। 

१० असोज २०६६ मा जिल्ला शिक्षा कार्यालयका लेखापाल शिवशंकर महतोबाट डेढ लाख रुपैयाँ नगद लुटपाट गरेको आरोपमा चोरी मुद्दा दर्ता भएको थियो। 

उनै यादवले फोन गरी एसपीलाई नै मधेसमा लुट्न आएको भनी आमाचकारी गालीगलौज गरेको भिडिओ सर्वत्र छ। उनै यादवले राजनीतिक प्रभावको आधारमा गुन्डागर्दी मात्र मच्चाएका छैनन्, उनलाई लिन गएको प्रहरी टोलीमाथि आक्रमण समेत गर्न लगाएका थिए। 

प्रहरीका अनुसार उनको खोजी तिव्र पारिएको छ।