६ महिनाअघि अन्तरजातीय बिहे गरेका थिए कलाकार कलकतियावालीले, पत्नी मृत भेटिइन्

काठमाडौं– कलाकार अभिनास झा ‘कलकतियावाली’की पत्नी अंशा सदा मृत फेला परेकी छन्। ६ महिनाअघि मात्र बिहे गरेकी सदा घरमा नै मृत भेटिएकी हुन्।

गत माघ महिनामा विवाह बन्धनमा बाँधिएका झा दम्पतीले गृह प्रवेश समारोह समेत सामाजिक सञ्जालमार्फत सार्वजनिक गरेका थिए। 

उनीहरू धार्मिक विधिपूर्वक गृह प्रवेश गर्दै खुसी मुद्रामा देखिएका थिए।

सोमबार राति जनकपुरधाम उपमहानगरपालिका–१२ र २० को बीचमा रहेको नोचापुरस्थित घरमा अंशा मृत अवस्थामा भेटिएकी हुन्।

घटनास्थलको प्रारम्भिक अनुसन्धानका लागि प्रहरीले घरमा निगरानी बढाएको छ।

हालसम्म अंशाको माइती पक्ष नआएकाले कानुनी प्रक्रिया अघि बढाउन कठिन भइरहेको प्रहरीले जनाएको छ। 

माइती पक्ष उपस्थित भएपछि मात्र शवलाई पोष्टमार्टमका लागि पठाइनेछ।

प्रहरीको प्रारम्भिक अनुसन्धानअनुसार मृतकले आत्महत्या गरेको हुन सक्छ। यद्यपि यस विषयमा पनि गहिरो अनुसन्धान गरिने प्रहरीले जनाएको छ।