सर्लाहीमा झडप हुँदा इन्स्पेक्टरसहित तीन घाइते, प्रहरीले गोली चलायो 

काठमाडौं– सर्लाहीमा बाटो विस्तारको विषयमा दुई पक्षबीच झडप हुँदा प्रहरी निरिक्षक (इन्स्पेक्टर)सहित तीन जना घाइते भएका छन्। स्थिति नियन्त्रणमा लिन प्रहरीले गोली चलाएको छ।

सर्लाहीको बरहथवा नगरपालिका–४ खैराटोलमा बाटो विस्तारक्रममा शनिबार बिहान दुई पक्षबीच भएको झडपले उग्ररुप लिँदा प्रहरी निरीक्षक (इन्स्पेक्टर) सहित तीन जना घाइते भएका हुन्।

प्रहरीले झडप नियन्त्रणमा लिन एक राउन्ड हवाई फायर गरेको छ। झडपमा इलाका प्रहरी कार्यालय बरहथवामा कार्यरत प्रहरी निरीक्षक दीवाकर गणेशसहित तीन जना घाइते भएका हुन्।

प्रहरी निरीक्षक गणेश झडप नियन्त्रणमा लिनेक्रममा र अन्य दुई सर्वसाधारण भने आपसमा झडप हुँदा घाइते भएको प्रहरीले जनाएको छ। 

घाइतेहरूको उद्धार गरेर अस्पताल लगिएको छ। घटनास्थलमा अहिले इलाका प्रहरी कार्यालय बरहथवाबाट प्रहरी नायब उपरीक्षक (डिएसपी) को नेतृत्वमा र सशस्त्र प्रहरीको समेत गरी ठूलो सङ्ख्यामा प्रहरी तैनाथ गरिएको छ।