लागुऔषध कारोबारीको मुद्दा मिलाउन १० लाख एसपीले नै मागेको आरोप, ४ लाख दिइसकेको प्रमाण!

काठमाडौं– सप्तरी प्रहरी प्रमुख उपरिक्षक (एसपी) ढकेन्द्र खतिवडा अवैधानिक रुपमा रकम उठाएको विषयको विवादमा तानिएका छन्। 

खतिवडाले प्रहरी कर्मचारी खटाएर सप्तरीको कोशी ब्यारेज क्षेत्रमा रहेका होटल सञ्चालकसँग रकम लिएको विषय सतहमा आएको हो। 

उक्त विषयको भिडिओ अहिले सामाजिक सञ्जालमा पनि ब्यापक बनिरहेको छ। 

फरार रहेको भनिएका एक जना लागु औषध गाँजा कारोबारी पक्राउ गरी म्याद थपिएको भन्ने समाचार जिल्ला प्रहरी कार्यालयले सार्वजनिक गरेपछि यो विषयको खुलासा भएको हो। 

असार १ गते जिल्ला प्रहरी कार्यालयले हनुमाननगर कंकालनी नगरपालिका–१ का बुधन भनिने जोगानन्द मण्डललाई पक्राउ गरी सूचना जारी गरेको थियो। 

उनलाई ७ दिन म्याद थप भएको प्रेस विज्ञप्ति प्रहरीले सार्वजनिक गरेको थियो। 
यस्तो छ विज्ञप्ति 

उनै बुधन बिगतदेखि नै प्रहरीसँग समन्वयमा रहेका थिए। बुधनका बुवा भागवत मण्डलले सञ्चालन गरेको होटलमा प्रहरीका घुमुवा आउने र खाने अनि बिल समेत तिर्ने नगरेको भागवतका अर्का छोराले बताएका छन्। 

दाईलाई पक्राउ नगर्नका लागि पटक–पटक रकम तिरेको पनि खुलाएका छन्। 

उनलाई पक्राउ नगर्नका लागि भागवत र उनको परिवारसँग एसपी खतिवडाको १० लाखमा डिल भएको र चार लाख रकम लगेको सतहमा आएको हो।

लागु औषध कारोबारी भनिएका बुधन मण्डलका बुवा भागवत मण्डलका अनुसार प्रहरीले धेरै समयसम्म पनि दुख दिइरहेको छ। रकम बुझाउँदा समेत धर नपाएको बताएका उनले भने,‘६ जना छोरालाई कोशी ब्यारेजमा होटल व्यावसाय गरेर पालिरहेको छु। मेरा विषयमा अहिलेसम्म कहिँ कतै निवेदनसमेत परेको छैन। तर, अहिले दुख पाइयो।’

यो विषय सतहमा आउनुको प्रमुख प्रमाणचाहिँ प्रहरीले रकम बुझेको भिडिओ सर्वत्र हुनु पनि हो। सोही होटलमा रहेको सीसीटीभी क्यामेरामा भागवतका अर्का छोराले प्रहरीलाई रकम दिएको भिडिओ कैद भएको थियो।  

बरिष्ठ प्रहरी नायव निरिक्षक (सई) विश्वनाथ त्रिपाठीले बर्दीमा नै दुई पटक गरी रकम लिएको भिडिओ होटल सञ्चालकको सीसी क्यामेरामा कैद भएको भेटिएको छ। रकम लिएको भिडिओ सार्वजनिक भएपनि होटल सञ्चालक भन्छन्,‘१० लाखमा डिल भएको हो, दुई पटक गरी चार लाख बुझाइसक्यौं। भिडिओमा २–२ लाख गरी दुई पटक दिएको हो।’

प्रहरी चौकी भारदहबाट खटेको टोलीबाट रकम उठाइएको पाइएको हो। रकम लिँदै गरेको तस्बिर तल छ।

यस विषयमा सप्तरीका प्रमुख जिल्ला अधिकारी (सीडीओ) भोला दाहालले यस विषयको जानकारी नआएको बताए। कर्मचारीले गैर कानुनी हिसाबले घुस रिसवत लिएको अवस्था भए कानुनी हिसाबले सम्बन्धित निकायले कारबाही गर्ने दाहालले बताए।

उनले भने,‘यदि त्यस्तो खालको अवस्था भएको खण्डमा अनुसन्धान गर्ने निकाय छन्, त्यसले गर्दछ।’