रास्वपाले दुई जना नेतालाई पार्टीबाट निकाल्यो, गुपचुप राखिएको निर्णय पर्दाफास

काठमाडौं– राष्ट्रिय स्वतन्त्र पार्टी (रास्वपा)ले दुई जनालाई पार्टीको साधारण सदस्यबाट समेत निकालेको छ। जिम्मेवार पदाधिकारी रहेकालाई निलम्बनपछि सदस्यता नै खारेज गरिदिएको हो।

सचिवालय बैठकले कोशी प्रदेशका दुई नेताको सदस्यता खारेजी गर्ने निर्णय गरेको थियो।

कोशीका निलम्बित प्रदेश सभापति राजेश तिम्सिना र प्रवक्ता कमलबाबु मैनालीको सदस्यता सचिवालय बैठकले खारेजी गरेको हो। यद्यपि रास्वपाको विधानमा सदस्यता खारेजी केन्द्रीय समितिले मात्रै गर्न पाउनेछ।

सोही अनुरूप सचिवालयको यस निर्णयलाई केन्द्रीय समितिमा अनुमोदनका लागि लैजाने निर्णय भएको छ। निर्णय सार्वजनिक भएपनि कार्यबाहक प्रवक्ता मनिष झाले निर्णय गरिएको बताए।

प्रदेश सभापतिलाई केही समयअघि पार्टी अनुशासन आयोगले नै निलम्बन गरेको थियो। उनले यसअघि कारबाहीमा परेका महामन्त्री डा. मुकुल ढकाललाई पार्टीको जिम्मेवारीमा फर्काउन पर्ने बताएका थिए।

उनीहरूले गत वैशाख १७ गतेबाटै स्वतन्त्र राष्ट्रवादी विचार समूह भन्दै अलग अभियान थालेका थिए। एकातिर राष्ट्रिय झन्डा र अर्कोतिर रास्वपाको चुनाव चिह्न घन्टी राखेर हिन्दु राज्य र राजसंस्था पुनस्र्थापनाको अभियान चलाएका थिए।