दर्जन बढी बलिउड फिल्मका नामको फन्ट तयार पारेका महर्जनको नयाँ टाइपो आमीरले प्रयोग गरे

काठमाडौं– एक दर्जनभन्दा बढी चर्चित बलिउड फिल्मका पोस्टरसहितमा प्रयोग हुने नामको फन्ट तयार पारेका नेपाली डिजाइनर आनन्द महर्जनको नयाँ टाइपो फन्ट आमीर खानको चर्चित सिक्वेल फिल्ममा पनि प्रयोगमा आएको छ।

महर्जनले तयार पारेको हिन्दी टाइपो फन्ट ‘तारे जमीन पर’को सिक्वेल ‘सितारे जमीन पर’मा प्रयोगमा ल्याइएको छ। हिन्दी र अंग्रेजीमा तयार पारेको फन्ट मधय हिन्दी प्रयोगमा ल्याइएको हो। महर्जनले यस विषयलाई पुष्टि गरेका छन्। 

आमीरको ‘तारे जमीन पर’ निक्कै भावनात्मक रुपमा प्रस्तुत गरिएको फिल्म थियो। जसले बलिउड बजारमा राम्रो कमाई गरेको थियो।

मङ्गलबार सार्वजनिक भएको चलचित्रको ट्रेलरमा महर्जनले डिजाइन गरेको टाइपो देखिएको हो।

यसबाहेक महर्जनले दर्जन बढी हिन्दी फिल्मका नामको फन्ट तयार पारेका थिए जसलाई प्रयोगमा ल्याइयो।

‘छवा’, ‘जवान’, ‘ब्रह्मास्त्र’, ‘आदिपुरुष’, ‘एङ्ग्री यङ म्यान’, ‘ब्याड न्युज’ र ‘लाल सिंह चड्डा’, ‘रकी और रानी’, ‘डंकी’, ‘धडक’, ‘केदारनाथ’, ‘मडगाउँ एक्सप्रेस’, ‘सूर्यवंशी’, ‘अतरंगी रे’, ‘भोला’, ‘टोटल धमाल’, ‘प्याडम्यान’, ‘ट्युबलाइट’, ‘जल्ली एलएलबी२’, ‘रक्षा बन्धन’, ‘राम सेतु’, ‘हिन्दी मिडियम’, ‘झुन्ड’लगायतका फिल्मका फन्ट तयार पारेका थिए।

आउट सोर्सिङमार्फत भारतको पोस्टर डिजाइन एजेन्सी एच–वनसँग सहकार्य गर्दै आएको र त्यहींमार्फत विभिन्न बलिउड चलचित्रका लागि टाइपो बनाउने अवसर पाएको महर्जनलाई उदृत गर्दै टेकपानाले जनाएको छ।