आईजी थापाको क्वीक एक्सन: सप्तरीमा बलात्कार अभियोगबाट सफाई लिने र डीएसपीको के हो? छानबिन गर्नू

काठमाडौं- बलात्कार मुद्दामा सफाइ पाएको व्यक्तिसँग बसेर प्रहरी कर्मचारीको जन्मदिन मनाएको तस्बिरबारे छानबिन गर्न प्रहरी महानिरीक्षक (आइजिपी) दीपक थापाले  निर्देशन दिएका छन्।

सप्तरीमा बलात्कार मुद्दामा राजविराज-६ का आकाश आदर्शले सफाइ पाएको र सफाइ पाएको भोलिपल्टै डिएसपी क्वार्टरमा आयोजित एउटा पार्टीमा सहभागी भएको भन्ने समाचारबारे बुधबार राज्यव्यवस्था तथा सुशासन समिति सभापति रामहरि खतिवडाले आइजिपी थापालाई प्रश्न गरेका थिए।

जबाफमा आइजिपी थापाले  मधेस प्रदेश प्रहरी कार्यालयलाई यस घटनाको छानबिन गर्न निर्देशन दिएको बताएका हुन्। 

‘डिएसपीको क्वार्टरको उक्त तस्बिर अगाडिकै रहेछ। पत्रिकामा आज निस्केको हो। त्यस सन्दर्भमा मैले मधेस प्रदेशका डिआइजीलाई छानबिनको लागि के भएको हेर्नु भनेको छु। इन्स्पेक्टरको बर्थड‍‍े रहेछ। उनले लिएर डिएसपीको क्वार्टरमा बसेको फोटो आएको छ। यसलाई नोटिसमा लिएर प्रहरी प्रधान कार्यालयले छानबिन गरिरहेको छ,’ उनले भने।

राजविराज-६ का आकाश आदर्शले बलात्कार मुद्दामा जिल्‍ला अदालत सप्तरीबाट जेठ ४ गते सफाइ पाएका थिए। 

त्यसको भोलिपल्टै प्रहरी निरीक्षक मनीष श्रेष्ठको जन्मदिन बनाउन जिल्ला प्रहरी कार्यालय सप्तरीका डिएसपी जितेन्द्रकुमार बस्नेतको क्वार्टरमा पार्टी गरिरहेको तस्बिर बाहिरिएको थियो।