काठमाडौं– रास्वपा सभापति रवि लामिछानेविरुद्ध संसदीय छानबिन समिति गठन गराई त्यसको प्रतिवेदनको ब्रिफिङ गर्दा महामन्त्री गगन थापाबारे कांग्रेस सभापति शेरबहादुर देउवाले सटिक टिप्पणी गरेका थिए,‘महामन्त्रीले भनेको पत्याएको थिइँन। रवि त चलाख मानिस रहेछन्। धन्यवाद गगनलाई।’
संसदीय दलको नेतामा आफूसित प्रतिस्पर्धा गरे पनि महामन्त्री थापामाथि देउवाको विश्वास निक्कै गहिरो बन्न थाल्यो। त्यसैले एमालेसँगको गठबन्धन गरी सरकारका प्राथमिकताका साझा धारणा बनाउन पनि थापालाई सरिक गराए।
१४औं महाधिवेशनमा नेता शेखर कोइरालाको समूहबाट महामन्त्रीमा निर्वाचित भएका थापा नेतृत्वमा पुग्ने खाका कोरिरहेका छन् र उनको यो राजनीतिक ‘अल्जेब्रा’को यात्रा हो। किनभने अंक गणितमा उनी संस्थापनभन्दा कमजोर अवस्थामा रहेका छन्।
देउवाले थापामाथि विश्वासको कसी बलियो बनाएका छन्। तथापी कोइराला समूहले भने थापा टाढा भइनसकेको दाबी गर्दै आएको छ। तर, थापाले समातेको नेतृत्वमा पुग्ने बाटोलाई हेर्ने हो भने उनी संस्थापनका उदाउँदा उत्तराधिकारी हुन् भन्ने स्पष्ट ‘स्पेश’ छन्।
यो किन पनि भन्न सकिन्छ भने कोइराला समूहमा प्रवेश गर्नुअघि उनी कृष्णप्रसाद सिटौलाको टीममा थिए। सोही टीममा रहेर केन्द्रीय सदस्य र स्वास्थ्यमन्त्री बनिसकेका थापा अब सभापति, संसदीय दलको नेता र प्रधानमन्त्री बन्ने ध्याउन्नमा छन्।
उनले भनिसकेका छन्,‘६० बर्षको उमेर पुगेपछि म राजनीतिमा सक्रिय भूमिकामा रहन्न।’ राजनीतिमा प्रधानमन्त्री जस्तो सपनाको कुर्सी, सभापति जस्तो नेतृत्वको टाकुरामा उभिन थापाले फास्टट्रयाक नै रोज्नेछन् र त्यो भनेकै यसबेलाका निम्ति देउवाको विश्वास जित्नु हो। देउवा किन पनि अनुकूल पात्र हुनेछन् भने दुई कार्यकालको सभापति पदपछि विधानका हिसाबले अब नेतृत्वमा रहन पाउने छैनन्। उनले अगाडि सार्ने उत्तराधिकारीको खोजी पनि भइरहेको छ।
लोकप्रियताका हिसाबले पनि देउवाका लागि थापा अनुकूल पात्र बन्नेछन् जसको टीममा पत्नी आरजु राणालाई महिला उपसभापतिको उम्मेदवार बनाउन सक्ने सम्भावनाको लेखाजोखा गरिन्छ।
थापा नेपालको समकालीन राजनीतिमा उदाएका प्रभावशाली नेताहरू मध्य एक हुन्। विशेषगरी युवा पुस्तामाझ लोकप्रिय थापालाई राजनीतिमा सुधार र समृद्धि ल्याउने नेताका रूपमा लिइन्छ। उनले आफ्नो स्पष्ट दृष्टिकोण, प्रखर वक्तृत्वकला, र दूरदृष्टियुक्त सोचले नेपाली जनताका मन जित्न सफल भएका छन्।
गगन थापा काठमाडौंको कुपन्डोलमा जन्मिएका हुन् र उनले त्रिभुवन विश्वविद्यालयबाट समाजशास्त्रमा स्नातक गरेका छन्। विद्यार्थी जीवनदेखि नै राजनीतिमा सक्रिय थापा नेपाल विद्यार्थी संघ (नेविसंघ) मार्फत राजनीतिमा प्रवेश गरेका हुन्।
उनी नेपाली कांग्रेसभित्र ‘युवा नेता’ का रूपमा चिनिन्छन् र जनताको चाहना र समस्यालाई नजिकबाट बुझ्न सक्षम नेताका रूपमा स्थापित भएका छन्।
महामन्त्रीका रूपमा, गगन थापाले पार्टीलाई नयाँ युगमा प्रवेश गराउन विशेष पहल गरिरहेका छन्। उनले पार्टीभित्र युवा पुस्ताको भूमिकालाई अझै सशक्त बनाउन विभिन्न कार्यक्रम र नीति ल्याउनमा जोड दिएका छन्।
थापाले कांग्रेसलाई लोकतान्त्रिक मूल्यमान्यतामा आधारित रहँदै समावेशी बनाउने प्रयास गरिरहेका छन्।
उनको वक्तृत्व क्षमता र जनतासँगको संवाद क्षमताले उनलाई अन्य नेताभन्दा फरक स्थानमा उभ्याएको छ। विभिन्न राजनीतिक सभाहरूमा उनले उठाउने जनचासोका मुद्दाहरू—जस्तै शिक्षा, स्वास्थ्य, रोजगारी, र दिगो विकास—ले थापालाई एउटा जिम्मेवार र भविष्यमुखी नेताका रूपमा चित्रण गरेको छ।
गगन थापाको प्राथमिकतामा विशेषगरी स्वास्थ्य र शिक्षा क्षेत्र सुधार रहेको छ। स्वास्थ्य मन्त्रालय सम्हाल्दा उनले केही उल्लेखनीय कार्य गरेका थिए।
विशेष गरी, उनले सस्ती औषधि उपलब्ध गराउन र स्वास्थ्य सेवामा पहुँच विस्तार गर्न विभिन्न कदम चालेका थिए। यस्तै, उनले शिक्षाको पहुँच र गुणस्तर सुधारका लागि विशेष योजनाहरू अघि सारेका छन्।
आधुनिक सोच र प्रविधिको प्रयोगमार्फत देशलाई दिगो विकासतर्फ अघि बढाउने थापाको अठोटले युवा पुस्तालाई प्रेरित गरेको छ। उनले आफ्नो राजनीतिक यात्रालाई पारदर्शी र उत्तरदायी बनाउने प्रयास गर्दै आएका छन्।
सामाजिक सञ्जालमा पनि थापाको सक्रियता उच्च छ, जसले जनतासँग सिधा संवाद गर्न र उनीहरूको सुझावलाई आत्मसात् गर्न मद्दत गरेको छ।
तर, गगन थापामाथि आलोचनाहरू पनि छन्। केहीले उनलाई ‘विचारभन्दा बढी प्रचारमा सक्रिय’ भएको आरोप लगाउने गर्छन्। पार्टीभित्र आन्तरिक विवाद समाधानमा सक्रिय सहभागिता जनाउनुपर्ने माग पनि उठिरहेको छ।
यद्यपि, थापाको नेतृत्व क्षमतामाथि धेरैले विश्वास राखेका छन्। उनी नेपाली कांग्रेसलाई नयाँ ऊर्जासहित बलियो बनाउन सक्षम नेताका रूपमा हेरिन्छन्। गगन थापाको राजनीतिक यात्रा अझै लामो छ, र उनका कार्यहरूबाट नेपालका जनताले ठूलो अपेक्षा राखेका छन्।
जनका यी अपेक्षा पूरा गर्न पनि उनले कांग्रेसको नेतृत्वमा पुग्ने यात्रामा छन्। ‘अहिले बलियो महामन्त्री र अडान लिन सक्ने नेताका रुपमा उहाँ परिचित भइसक्नु भएको छ’, थापा निकट युवा नेता भन्छन्,‘त्यसैले पनि सभापति शेरबहादुर देउवाले विश्वास गर्नु नयाँ कुरा होइन। तर, आगामी नेतृत्वमा कुन टीममा रहने भन्ने विषय अहिले छलफलको चरणमा छन्।’
थापा देउवाको उत्तराधिकारी किन पनि हुन्छन् भने डा. कोइरालाले फेरि सभापतिमा लड्ने घोषणा गरी आन्तरिक तयारी गरिसकेका छन्। अबको दुई बर्षभित्र कांग्रेसको महाधिवेशन समयमा नै गर्ने सहमति समेत भइसकेको छ। यस अवस्थामा अंकको नभई फरक हिसाबको शिराबाट महामन्त्री थापा सभापतिको तयारीमा जुट्ने सम्भावना बलियो छ।
