बाहलवाला राष्ट्रपति हुँदै भण्डारीसँग प्रधानमन्त्रीको शपथ लिँदा ‘त्यो पर्दैन’, अब पार्टीमा ‘आउन पर्दैन’

काठमाडौं– नेकपा एमालेभित्र कायम रहेको नेता कार्यकर्ताको ठूलो उकुसमुकुस अध्यक्ष तथा प्रधानमन्त्री केपी शर्मा ओली, उपाध्यक्ष विष्णु पौडेल, महासचिव शंकर पोखरेललगायतका कारणले विस्फोटको चरणमा पुगेको छ।

सचिवालयको बैठकमा भएका केही निर्णय र पोलिटब्यूरोमा देखाइएका हर्कतका कारण अब एमाले बिभाजन या बिसर्जनको अवस्थामा पुग्न सक्ने मार्गचित्र कोरिएको छ।

ओलीको सामाजिक राजनीतिक अलोकप्रियता, पार्टीभित्र माओवादी अध्यक्ष पुष्पकमल दाहाल प्रचण्डको जस्तो अनन्तकालसम्म नेतृत्वमा रहने प्रवृत्ति र महत्वकांक्षाको उर्बरता र नेतृत्व हस्तान्तरण गर्न नचाहने ढिट प्रकट नै यसको मुख्य कारण देखिने पक्कापक्की छ।

आन्तरिक राजनीतिमा पनि जसरी प्रतिस्पर्धाबाट ओलीको लोकप्रिय उदय भएको थियो, उनको बहिर्गमन या अवतरण निक्कै अलोकप्रिय हुने संकेत देखा परेको हो।

ओलीले शुक्रबार पोलिटब्यूरो बैठकमा भण्डारीका पक्षमा नभई विधानका विषयमा प्रष्ट बनाउन खोज्ने, प्रश्न सोध्न खोज्नेको मुख टाल्ने र महासचिव पोखरेलमार्फत बन्द गराउन खोज्न नियत प्रकट गरेका थिए।

त्यसअघि सचिवालयको बैठकमा बरिष्ठ उपाध्यक्ष ईश्वर पोखरेलसँग मुखामुख र पदाधिकारी घटाउने एकल निर्णय गरेर विधान महाधिवेशनमा जाने निधो गरेका छन्।

यति मात्र होइन बाहलवाला राष्ट्रपति रहेकी विद्यादेवी भण्डारीसँग तेस्रो पटक प्रधानमन्त्रीको शपथ लिँदा ‘त्यो पर्दैन’ भनी त्यस गरिमालाई होच्याएका ओलीले अहिले उनलाई पार्टीमा सक्रिय हुन खोज्दा आउन पर्दैन भनी बाटो छेकेका छन्।

‘मदन भण्डारीको लोकप्रियताले स्थापित भएको नेकपा एमाले ओलीको अहंकारका कारण बिसर्जन हुने खतरा बढेको छ’, एमालेका एक नेता भन्छन्,‘सत्ता चलाउँदा सडकमा चरम अलोकप्रिय रहेका अहिले उनी पार्टीभित्र निषेधको राजनीति गरिरहेका छन्। जसलाई जनताको बहुदलीय जनवादले स्वीकार गर्दैन।’

लिगेसीका हिसाबले भन्ने हो भने पनि विद्यादेवी भण्डारी एमालेको मार्गनिर्देशक सिद्धान्त जनताको बहुदलीय जनवादको आधिकारिक उत्तराधिकारी हुन्। तर, प्रक्रियागत हिसाबमा आउन खोज्दा ओलीले रोक्न खोजिरहेका छन्।

ओलीले यसअघि नै पार्टीमा उनीसँग प्रतिस्पर्धा गर्न सक्ने सबैलाई निकालिसकेका छन्। एक हदसम्म उनले अनन्तकालसम्म पार्टीको नेतृत्वमा बस्ने नियतमा पार्टी कब्जा गर्न खोजेको भान हुन्छ भने ओलीलाई उचाल्ने महासचिव पोखरेललगायत उपमहासचिव विष्णु रिमालले सानो घेराभित्र हालीमुहाली मच्चाउने परोक्ष स्वार्थ हुर्काइरहेका छन्। 

नेकपा विभाजनपछि एमाले सम्हाल्नुपर्नेमा ओलीले प्रतिस्पर्धी देखेका माधवकुमार नेपाल, झलनाथ खनाल, बामदेव गौतमलाई लखेटे। त्यसपछि १०औं महाधिवेशनमा अध्यक्षमा प्रतिस्पर्धा गरेका भिम रावललाई कारबाही गरिदिए। अहिले अध्यक्षका लागि तयार रहेको भनी पार्टीमा फर्किएको घोषणा गरेकी भण्डारीलाई बाटो छेकिरहेका छन्।

‘एमालेमा अब विस्फोट हुने सम्भावना छ। केही सीमित व्यक्तिको परोक्ष स्वार्थको केन्द्रमा आफूलाई राखेर ओलीले एमाले जस्तो बलियो कम्युनिस्ट पार्टीलाई प्रतिस्पर्धामा जाने बाटो बन्द गरी बिसर्जनको यात्रामा लगिरहेका छन्’, उच्च स्रोतले भन्यो।