सबैलाई मिलाएर संविधान संशोधन हुन्छ : गगन थापा

काठमाडौँ- नेपाली काँग्रेसको महामन्त्री गगन थापाले एमाले-काँग्रेस नेतृत्वको सरकारले सबैको सहमतिमा संविधान संशोधन गरिने बताएका छन् ।

४९ औँ राष्ट्रिय मेलमिलाप दिवसको अवसरमा हेटौंडाम आयोजित कार्यक्रममा बोल्दै महामन्त्री थापाले देशको स्थायित्वको लागि संविधान संशोधन आवश्यक रहेको उनले बताए । अहिलेको निर्वाचन प्रणालीले गर्दा देशमा राजनीतिक स्थायित्व नआउने देखेर एमाले-काँग्रेस मिलेर सरकार निर्माण गर्दै संविधान संशोधनको तयारी गरेको बताए ।

सरकारले संविधान संशोधनको विषयलाई सबै दलको साझा धारणा बनाएर लैजाने कसरत सुरु गरिसकेको भन्दै थापाले संघियताको विषयलाई पनि संविधान संसोधनमार्फत केही परिमार्जन गर्नुपर्ने बताए ।

प्रदेशको अहिलेको संख्यामा जनप्रतिनिधि आवश्यक नरहेको बताउँदै थापाले प्रदेश तहमा हुने जनप्रतिनिधि र मन्त्रीको सङ्ख्यालाई संविधान संशोधन मार्फत घटाइनुपर्ने बताए ।

फरक प्रसंगमा बोल्दै थापाले नेपाली जनतामा प्रगतिको भोक रहेको बताए । उनले भने आजको दिनको नेपाली समाजको सबैभन्दा ठूलो समस्या भनेको प्रगतिको भोक छ, त्यसमा हामीले सोच्नुपर्नेछ,’ थापाले अघि भने, ‘जनता छन्, उनीहरूसँग समस्या छन्, त्यसको समाधान काँग्रेसले पूरा गरिदियोस् भन्ने छ । पुराना कुरामा अड्किएर बस्ने होइन । नेपाली समाज उकुसमुकुस छ । त्यसलाई हामीले सम्बोधन गर्नुपर्ने छ ।’

आफूले विदेशीको लगानी भित्र्याउनेगरि अनलाइन बिज्नेसको कुरा गर्दा कीर्तिपुरको डाँडा भनेर ट्रोल गरिएको भन्दै अब कानून संशोधित गर्दै विदेशी लगानीलाई नेपालमा ल्याउने र नेपालको सफ्टवेयरमा काम गर्नेहरूलाई विदेशमा पनि कम्पनी खोल्न मिल्ने वातावरण बनाइने उनले बताए ।