एजेन्सी– इटालिका २२ वर्षीय यूवा खेलाडी जनिक सिनरले अस्ट्रेलियन ओपन टेनिसको उपाधि जितेका छन् ।
पहिलो पटक ग्रान्डस्लाम उपाधि जित्ने क्रममा सिनरले रुसका डेनियल मेदभेडेभ विरुद्ध २ सेटमा पछि परेको अवस्था उल्टाउँदै उपाधि हात जितेका हुन् ।
सिनरले पाँच सेटको रोमाञ्चक खेलमा मेदभेडेभलाई ३–६, ३–६, ६–४, ६–४, ६–३ को सेटमा पछि पार्न सफल भए । ३ घण्टा ४४ मिनेट चलेको खेलमा सिनरले सुरुवाती दुई सेट गुमाएपनि त्यसपछि शानदार पुनरागमन गर्दै लगातार तीन सेट जितेर उपाधि हात परेका हुन् ।
२२ वर्ष १६५ दिनका सिनर अस्ट्रेलियन ओपन जित्ने पहिलो इटालियन खेलाडी समेत बन्न सफल भएका छन् । सिनरले यसअघि सेमिफाइनलमा १० पटकको अस्ट्रेलिया ओपन विजेता नोभाक जोकोभिचलाई पराजित गर्दै फाइनलमा स्थान बनाउन सफल भएका थिए ।
यसअघि सिनर २०२० मा भएको फ्रेन्च ओपनको क्वार्टरफाइनल, २०२३ मा विम्बल्डनको सेमिफाइनल र २०२२ को युएस ओपनको क्वाटरफाइनल सम्म पुगेका थिए । सिनर २००८ पछि प्रतियोगिता जित्ने सबैभन्दा कान्छो खेलाडी समेत बनेका छन् । यसअघि सन् २००८ मा नोभाक जोकोभिचले २० वर्ष २५० दिनको उमेरमा उपाधि जितेका थिए ।
ग्रान्डस्लाम जित्ने तेस्रो इटालियन बनेका सिनर अस्ट्रेलियन ओपन जित्ने पहिलो इटालियन खेलाडी बने । यसअघि निकोला पिएट्रान्जेलीले सन् १९५९ र १९६० मा फ्रेन्च ओपनको उपाधि जितेका थिए । त्यस्तै सन् १९७६ मा एड्रियानो पानाट्टाले पनि फ्रेन्च ओपन जितेका थिए ।
