सिपाहीका मसिहा बन्दै सशस्त्र आईजी अर्याल, निर्मम राशनको कथा यसरी उठान गरिदिए

काठमाडौं– सिपाहीका पीडालाई बुझ्न नसक्ने कमान्डरको सुरक्षा बलमा अर्थ रहँदैन। तर, जसले बुझ्न सक्छ त्यो एक मसिहा बन्छ। यहि यात्राको लयमा छन् सशस्त्र प्रहरी बल (एपीएफ)का महानिरिक्षक (आईजी) राजु आर्याल।

संगठन प्रमुख भएपछि अनेक सुधारका अभियान सुरु गरेका उनले यस पटक राज्यसँग सिपाहीका पीडा साटेका छन्। यो पीडाबाट पार लगाउनका लागि प्रस्ताव पनि गरेका छन्।

अर्यालले सुरक्षाकर्मीलाई दैनिक रासनका लागि छुट्याइने रकम साह्रै न्यून भएको बताए। मुलुकको आर्थिक अवस्था कमजोर रहे पनि दैनिक प्रहरीलाई छुट्याइएको २ सय ३ रुपैयाँले नपुग्ने गरेको बताए।

भत्ता र तलवदेखि उपचार खर्चमा करोडौं खर्च पेस गर्ने सांसदहरु सामु उनले यस्तो यथार्थ चित्रण गरेका हुन्। 

प्रतिनिधिसभाको राज्यव्यवस्था तथा सुशासन समितिको बिहीबारको बैठकमा महानिरीक्षक अर्यालले रासनका लागि छुट्याइएको रकमबारे सांसदहरूलाई जानकारी गराएका हुन्।

काठमाडौंमा हेर्दा २०३ रुपैयाँले बिहान चिया अण्डा त्यसपछि खाना (लन्च) त्यसपछि खाजा र बेलुका खाना, चार छाक खानुपर्छ। रासनको अवस्थाले कसरी चल्छन् सिपाही?

कांग्रेस सांसद दिलेद्रप्रसाद बडू, सरिता प्रसाईं, एमालेका रघुजी पन्त, राप्रपाका बुद्धिमान तामाङ, जसपाका प्रकाश अधिकारीले सुरक्षाकर्मीका लागि दैनिक रासनको रकमबारे चासो देखाएका थिए।

‘ठाउँठाउँमा रासनको यस्तो भयो, दुरुपयोग भयो भन्ने कुरा पनि आउँछ । हामी कहीँ गएर एउटा साधारण रेष्टुरेन्टमा खाँदा कति खर्च हुन्छ? यसलाई कसरी सुधार गर्न सकिन्छ भन्ने अवस्था आएको छ’, आईजी अर्यालले प्रश्न उठाए।

दैनिक २ छाक खाना र २ पटक खाजा खानुपर्छ। सशस्त्र सिपाहीलाई कहिले दाल पुग्दैन, कहिले तरकारीका कुरा पनि आउँछन्। चुपचाप बस्नु परेका सिपाहीका तर्फबाट उनले भने,‘हामी बोल्न मिल्दैन। तर, समस्या यहि हो।’

भनिन्छ, खानालाई तिम्रो औषधि र औषधिलाई तिम्रो खाना बनाऊ। तर सशस्त्रका लागि यस्तो तर्क कहाँ छ र?

प्रधानमन्त्री र मन्त्रीले अतिथि स्वागतका लागि बार्षिक करोडौं खर्च गर्छन्, राष्ट्रपतिको उपचार खर्च त कति हो कति? ५५ लाख त जाबो एक पटकमा। तर, जसले सीमा जोगाइरहेको छ, एउटा सशस्त्र सिपाही उसले के पाइरहेको छ? २०३ रुपियाँ दिनमा? एक प्लेट मोःमोः नि नआउने यो रकमले दैनिक खाना खर्च टर्छ? यो एक संगीन प्रश्न छ।