काठमाडौँ– टीकापुर घटनामा जन्मकैदको सजाय भोगिरहेका रेशम चौधरी आज रिहा भएका छन् ।
गणतन्त्र दिवसको अवसरमा राष्ट्रपति रामचन्द्र पौडेलबाट आममाफी पाएपछि चौधरी आज डिल्लीबजार कारागारबाट रिहा भएका हुन् ।
नागरिक उन्मुक्ति पार्टीका संरक्षकसमेत रहेका चौधरीको स्वागतमा बिहानैदेखि कारागार परिसरमा भीड लागेको थियो । सोही भीडले उनलाई फूलमाला लगाइदिएर स्वागत गरेको थियो ।
टीकापुर हत्याकाण्डमा दोषी ठहर भएर तीनै तहको अदालतबाट जेल सजाय पाएका चौधरी गणतन्त्र दिवसको अवसरमा राष्ट्रपतिबाट आममाफी पाएसँगै छुटेका हुन् ।
राष्ट्रपति रामचन्द्र पौडेलले अदालतको फैसलाबाट दोषी प्रमाणित भएर जेलमा रहेका चौधरीसहित १९ जना ‘बन्दी’लाई आइतबार आममाफी दिएका छन् ।
आइतबार बसेको मन्त्रिपरिषद्को बैठकले सिफारिस गरेअनुसार राष्ट्रपति पौडेलले चौधरीसहित १९ जना ‘बन्दी’लाई गणतन्त्र दिवसका अवसरमा आममाफी दिएका हुन् ।
२०७२ मा थारू आन्दोलनका क्रममा टीकापुरमा ७ प्रहरी र १ बालकसहित ८ जनाको विभत्स हत्या भएको थियो । सो घटनामा चौधरी मुख्य योजनाकार मानिएका थिए । यद्यपि, सरकारले आममाफी दिँदै रिहाइ गरेको हो ।
