खेलकुद

विश्वकप लिग टू क्रिकेटः अमेरिकासँग खेल्दै नेपाल, चिन्ता ब्याटिङकै

सिएन नेपाल

बिहीबार, मंसिर ८, २०७९

विश्वकप लिग टू क्रिकेटः अमेरिकासँग खेल्दै नेपाल, चिन्ता ब्याटिङकै

काठमाडौँ– आईसीसी विश्वकप लिग–टू एकदिवसीय क्रिकेटमा नेपालले आज घरेलु टिम अमेरिकासँग खेल्दैछ । खेल नेपाली समय अनुसार बेलुका ९ः १५ मा अमेरिकाको ह्युस्टनस्थित मुसा क्रिकेट स्टेडियममा सुरु हुनेछ । जारी त्रिकोणात्मक सिरिजमा नेपाल पहिलो र अमेरिका लगातार दोस्रो जितको खोजीमा छन् । नेपाल पहिलो खेलमा पराजित भएको ओमानलाई अमेरिकाले १ सय १४ रनले हराएको थियो । अमेरिका घरेलु मैदान र यही मनोबलका साथ मैदान उत्रनेछ । पहिलो खेलमा नेपाल भने ओमानसँग १४ रनले पराजित भएको थियो २ सय १२ रनको लक्ष्य पछ्याएको नेपाल मात्र १ सय ९८ रनमा समेटिएको थियो । ओमानसँगको खेलमा बलिङ बलियो देखिएपनि नेपाल ब्याटिङमा चुकेको थियो । उसो त नेपाली टिम सँधै अस्थिर ब्याटिङका कारण सोचेजस्तो नतिजा निकाल्नबाट बञ्चित रहँदै आएको छ । शुरुदेखि नै ब्याटिङको सकसमा रहेको नेपाली टिमले अझै ब्याटिङमा बलियो उपस्थिति जनाउन सकेको छैन । लामो समयपछि केही सम्हालिएको ओपनिङ ब्याटिङले पनि यसपटक नेपाललाई धोका दिएको छ । ओपनरहरू असिफ शेख र कुशल भुर्तेल दुबै घाइते भएपछि नेपाली ब्याटिङ थप समस्यामा परेको छ । बन्द प्रशिक्षण मै नभएका सुवास खकुरेललाई ओपनिङमा खेलाइएको छ । उनलाई ओमानसँगको खेलमा डेब्यु गरेका सुनिल धमलाले ओपनिङमा साथ दिनेछन् । ओमानसँगको खेलमा भरपर्दा ब्याटर दिपेन्द्रसिंह ऐरीले पनि गतिलो प्रदर्शन गर्न सकेनन् । यस्तै ठूला सट हानेर टिमको उद्धार गर्ने गरेका अलराउण्डर करन केसीले पनि ब्याटिङमा भरथेग गर्न नसक्दा नेपाल सानो लक्ष्यमा पनि पराजित हुनु परेको थियो । करणले बलिङमा भने ५ विकेट लिएर सनसनी मच्चाएका थिए । अमेरिकासँगको खेलमा कुशल भुर्तेल टिममा फर्किन सक्ने सम्भावना रहेको बताइएपनि निश्चित भइसकेको छैन । उनी उपलब्ध भए सुिनलसँग मिलेर ओपनिङ गर्ने सम्भावना छ । उनले पहिलो खेलमा १२ रन बनाएका थिए । नेपाललाई आज पनि मध्यक्रममा ब्याटरहरू ऐरी, आरिफ शेख र रोहितकुमार पौडेलको ब्याटिङको भर अर्थपूर्ण हुनेछ । अमेरिकासँगको खेलमा पनि नेपाली टिम ब्याटिङकै चिन्ताबाट सताइएको हुनेछ । कप्तान सन्दीप लामिछानेले पहिलो खेल ब्याटिङ भरपर्दो हुन नसकेकै कारण हार ब्यहोर्नुपरेको भन्दै पहिलो खेलको कमी कमजोरी सच्याएर खेल्ने बताएका छन् । अमेरिकी टिममा कप्तान मोनांक पटेल, सुशान्त मोदानी, स्टिभ टेलर, आरोन जोन्स, अलि खान जस्ता लयका खेलाडी छन् । नेपाल र अमेरिकाबीच अहिलेसम्म चारवटा एकदिवसीय क्रिकेट भएकोमा नेपाल तीन खेलमा विजयी भएको छ । दुई वर्षअघि कीर्तिपुरमा भएको खेलमा नेपालले अमेरिकालाई ३५ रनमा अल आउट गरेको थियो ।

प्रकाशित मिति: बिहीबार, मंसिर ८, २०७९

प्रतिक्रिया दिनुहोस्