नेपाली सेनाका ब्रिगेडियर जर्नेललाई कारबाही गर्न कोर्टमार्सल गठन, कारण त्यहि त हो नि!

काठमाडौं– नेपाली सेनाको कल्याणकारी कोषको २ करोड २५ लाख हिनामिना गरेको आरोपमा सहायक रथी (जर्नेल) रोशन खड्कालाई थप कारबाहीका लागि सैनिक अदालत (कोर्टमार्सल) गठन गरिएको छ।

प्रारम्भिक अनुसन्धानले खड्का कल्याणकारी कोषमा रहँदा अनियमिततामा संलग्न भएको पुष्टि भएपछि कोर्टमार्सल गठन गरिएको सैनिक स्रोतले जनाएको छ।

प्रधान सेनापतिले गठन गर्ने यस्तो इजलासले नै बहालवाला सैनिकको हकमा फैसला गर्छ। नेपाली सेनाका प्रधान सेनापति अहिले अशोकराज सिग्देल छन्।

सहायक रथी (ब्रिगेडियर जर्नेल) रोशन खड्का र सेनानी (मेजर) बोधराज कार्कीलाई सैनिक हिरासतमा राखेर फैसलाको प्रक्रिया सुरु भएको हो। 

यही हिनामिनामा संलग्न रहेका तर अवकाश भइसकेका अन्य २ जनाविरुद्ध भने जिल्ला अदालत काठमाडौँमा मुद्दा दायर भएको थियो। ती मध्ये जमदार आत्माराम थापा पुर्पक्षका लागि थुनामा छन्। 

वैशाख २८ गते जिल्ला न्यायाधीश दिवाकर भट्टको इजलासले थापालाई पुर्पक्षका लागि थुनामा पठाउन आदेश दिएको हो। अदालतमै मुद्दा दायर भइसकेका पूर्व सेनानी लक्ष्मण अधिकारी भने विदेश फरार छन्। हाल अमेरिकामा रहेका उनलाई इन्टरपोलको सहयोगमा नेपाल फिर्ता ल्याउने प्रक्रिया अगाडी बढेको छ। 

उनीहरु चार जनाले सैनिक कल्याणकारी निर्देशनालयमा कार्यरत रहँदा आवास तथा बिमा शाखाबाट आवास तथा बिमा बापतको रकम हिनामिना गरेको आरोप छ। 

उक्त शाखामा रहँदा वास्तविक रुपमा भुक्तानी गर्नु पर्ने व्यक्तिलाई नभई काल्पनिक नाम खडा गरेर रकम निकासा गर्ने र हिनामिना गर्ने कार्य गरेको प्रारम्भिक छानविनको निस्कर्ष छ।

यसरी २ करोड २१ लाख ५ हजार ५१५ रुपैयाँ ४ पैसा हिनामिना गरेको दाबी सेनाको छ। २०७४ कात्तिक १३ देखि २०७५ भदौ २६ गतेसम्म १४४ थान चेकबाट एक करोड ४७ लाख २१ हजार ३२९ रुपैयाँ ८८ पैसा र २०७३ फागुन ९ गतेदेखि २०७५ असोज १७ गतेसम्म ४० थान चेकबाट ४७ लाख ६४ हजार १८५ रुपैयाँ ६० पैसा हिनामिना गरेको आरोप छ। 

थुनामा रहेका पूर्वजमदारको बयानका आधारमा कोर्टमार्सल गठन भएको हो।