बालेनपत्नी सबिनाको व्यङ्ग्यः पार्टीको नाम र नम्बर कमेन्ट गर, अझै कन्टेन्ट दिन्छु

काठमाडौं– काठमाडौं महानगरपालिका प्रमुख (मेयर) बालेन शाहबारे अफवाह फैलाउने काम भएपछि पहिलो पटक उनी पत्नी सबिना काफ्लेले व्यङ्ग्य कसेकी छन्।

उनले पनि सामाजिक सन्जाल फेसबुकमा पति बालेनसहित परिवार र साथीको तस्बिर राखेर बालेनलाई विवादमा तान्न खोजेको विषयमाथि व्यङ्ग्य गरेकी हुन्। 

उनले भनेकी छन्,‘पार्टीको नाम र नम्बर केन्ट गर्नु अझै कन्टेन्ट दिन्छु।’

खासगरी महानगरपालिकाको प्रवक्ताको जिम्मेवारी पाएका कांग्रेसबाट जितेका नवीन मानन्धरले एउटा अन्तरवार्ताका क्रममा बालेनको युवतीसँगको तस्बिर देखाएको विषयलाई सबिनाले व्यङ्ग्य कसेको बुझ्न सकिन्छ। 

मानन्धरसँग बालेनको दूरी बढेका बेला अन्तरवार्ताका क्रममा उनले पुष्टि नहुने प्रकारले चरित्र हत्या गर्नेगरी टिप्पणी गरेका थिए। 

मानन्धरले भनेका थिए–

अहिले भर्खर (बालेनले) केटी जिस्क्याएको कुरा भाइरल भएको अवस्था छ। त्यसमा उहाँले केही बोल्नुभएको छ ? दुईजना केटीले के भनेको? भनेर उहाँलाई सोधिरहेको अवस्था छ। 

उहाँले बोलेको हामी आफैंले बुझिरहेको अवस्था छैन भने अरुलाई सुपारी चपाएर बोलेको भन्ने हो कि आफैंले सुपारी चपाएको अवस्था हो? केही फोटोहरु हामीलाई आइरहेको अवस्था छ। उहाँ कसरी बसिराख्नु भएको छ भनेर । एउटा फोटो मसित अझै छ।

त्यसपछि मानन्धरले आफ्नो मोबाइल निकाले। प्रस्तोताले उत्साहित हुँदै भन्छन्, ‘ल देखाउनुस् त मेयर बालेन साह कहाँ व्यस्त हुनुहुन्छ आज भोलि?’

त्यसपछि मानन्धरले एउटा तस्बिर क्यामरातर्फ देखाउँछन्। बालेनले एक युवतीलाई आलिंगन गरिरहेको उक्त तस्बिरमा देखिएको छ। ती युवती सार्वजनिकरूपमा परिचित होइनन्।

‘कोसँग हो मलाई के थाहा, उहाँलाई सोध्नुस। फोटो त हामीलाई सेन्ड भएको छ नि। पत्रकारहरुसँग त हाम्रो कुरा हुने हो नि!’

‘अलि यसरी देखाइदिनुस् त दर्शकले पनि थाहा पाउने गरेर,’ भण्डारीले आग्रह गरेपछि तस्बिर थप जुम गरेर देखाइन्छ।

मोबाइल थन्क्याउँदै मानन्धर थप्छन्, ‘महानगरपालिकाको प्रमुख आज कतै जाँदै के गर्छ, कसो गर्छ भनेर हामीले कहिल्यै सोधेको अवस्था छ? कार्यवाहक दिनु पर्दैन?’

मानन्धरले देखाएको तस्बिर ज्यास्मिन खनाल नामकी युवतीको हो। उनी एक डिजे भएको बताइन्छ। उनले आफ्नै इन्स्टा एकाउन्टमा बालेनसँगका दुई तस्बिर पोस्ट गरेकी थिइन्।

ति युवतीले बालेनको फ्यान भएका कारण तस्बिर खिचाएको बताएकी थिइन्। 

बालेन पत्नी सबिनाले त्यसैलाई इङ्गित गरेर व्यङ्ग्य कसेको हुनुपर्छ। उनले यस्ता धेरै तस्बिर देखेका कारण सामान्य हुने चिजलाई पनि अफवाह बनाइन थालिएपछि रोष प्रकट गरेको बुझिन्छ।