भारतका १६ राज्यमा फैलियो कोरोना संक्रमण

काठमाडौं- दुई वर्षयता शिथिल भएको कोरोना भाइरस पुनः सक्रिय हुन थालेको छ । दक्षिण पूर्वी एसियाली देशहरूमा कोरोना महामारी बढेको खबर आइरहेका बेला नेपालको दक्षिणी छिमेकी मुलुक भारतमा व्यापक हुन थालेको छ ।

समाचार अनुसार भारतको १६ राज्यमा कोरोना संक्रमण फैलिएको र एक हजार भन्दा बढी सक्रिय कोरोना संक्रमित पुष्टि भएको त्यहाँको स्वास्थ्य तथा परिवार कल्याण मन्त्रालयले जनाएको छ ।

मन्त्रालयका अनुसार भारतभरि कुल १ हजार ९ जनामा कोरोना संक्रमण पुष्टि भए पनि यो संक्रमण त्यति धेरै जोखिमयुक्त रहेको छैन। मन्त्रालयका अनुसार सबैभन्दा बढी कोरोना संक्रमित केरल राज्यमा देखा परेका छन् । जहाँ ४०३ जना सक्रिय संक्रमित छन् । यसै गरी महाराष्ट्रमा ४३०, दिल्लीमा १०४, गुजरातमा ८३, तमिलनाडुमा ६९, कर्नाटकमा ४७ जना संक्रमित फेला परेका छन् ।

उत्तर प्रदेशमा १५, राजस्थानमा १३, पश्चिम बंगलामा १२, हरियाणामा र पुडुचेरीमा ९र९, आंध्रप्रदेशमा ४, मध्यप्रदेशमा २, तेलंगाना, गोवा र छत्तिसगढमा १र१ जना संक्रमित फेला परेको भारतीय सञ्चारमाध्यमहरूले जनाएका छन् । सीमा जोडिएको भारतका विभिन्न राज्यमा कोरोना फैलिएपछि यसको असर नेपालमा पनि पर्ने देखिन्छ । समयमै यसतर्फ सचेत रहनुपर्ने आवश्यकता छ ।