हार्वर्ड विश्वविधालयमा विदेशी विद्यार्थीको भर्नामा रोक लगाउने ट्रम्प

काठमाडौँ - डोनाल्ड ट्रम्प प्रशासनले हार्वर्ड विश्वविद्यालयको विदेशी विद्यार्थीहरूलाई भर्ना गर्ने योग्यता रद्द गरेको छ ।

अमेरिकी गृह सुरक्षा सचिव क्रिस्टी नोएमले गृह सुरक्षा विभागलाई हार्वर्डको विद्यार्थी तथा विनिमय आगन्तुक कार्यक्रमको प्रमाणीकरण तत्काल प्रभावबाट रद्द गर्न आदेश दिएकी छिन् ।

अन्तर्राष्ट्रिय विद्यार्थीहरूलाई भर्ना गर्ने योग्यता पुन: प्राप्त गर्न, हार्वर्डले ७२ घण्टा भित्र अवस्थित अन्तर्राष्ट्रिय विद्यार्थीहरूको बारेमा जानकारी प्रदान गर्नुपर्छ । हाल, विश्वविद्यालयमा अध्ययनरत सबै विदेशी विद्यार्थीहरूलाई अन्य संस्थाहरूमा स्थानान्तरण गर्न भनिएको छ । अन्यथा, उनीहरूले देश छोड्नु पर्ने हुन सक्छ ।

विगत केही दिनदेखि हार्वर्ड र सरकारबीच विदेशी विद्यार्थीहरूसँग सम्बन्धित रेकर्डलाई लिएर विवाद भइरहेको थियो ।

गृह सुरक्षा विभागले अप्रिलमा यदि हार्वर्डले अप्रिल ३० सम्ममा विदेशी विद्यार्थीहरू संलग्न गैरकानूनी र हिंसात्मक घटनाहरूको पूर्ण रेकर्ड उपलब्ध गराएन भने, यसको  विद्यार्थी तथा विनिमय आगन्तुक कार्यक्रमको प्रमाणपत्र रद्द गरिनेछ।

विश्वविद्यालयले उपलब्ध गराएको रेकर्डसँग प्रशासन सन्तुष्ट हुन नसकेपछि ट्रम्प प्रशासनले कडा कदम चालेको छ ।

हार्वर्ड विश्वविद्यालयमा लगभग २७ प्रतिशत बाह्य विद्यार्थीहरू छन् । हाल त्यहाँ लगभग ६, ८०० विदेशी विद्यार्थीहरू अध्ययनरत छन् । धेरैजसो विद्यार्थीहरू एफ-१ वा जे-१ भिसामा छन् ।

एफ-१ भिसा अमेरिकी शैक्षिक संस्थामा अध्ययनरत विद्यार्थीहरूको लागि हो भने जे भिसा विद्वान र अनुसन्धानकर्ताहरू सहित एक्सचेन्ज आगन्तुकहरूको लागि हो ।

ट्रम्प प्रशासनले हार्वर्डले आफ्नो क्याम्पसमा हिंसा, यहूदी विरोधी भावना र चिनियाँ कम्युनिष्ट पार्टीसँग समन्वय गरेको आरोप लगाएको छ ।

विश्वविद्यालयहरूले विदेशी विद्यार्थीहरूलाई भर्ना गर्नु र उनीहरूबाट आफ्नो अरबौं डलरको ढुकुटी भर्न चर्को शुल्क लिनु विशेषाधिकार हो, अधिकार होइन भन्दै ट्रम्प प्रशासनले हार्वर्डलाई धेरै मौका दिइएको तर यसले कानूनको पालना नगरेको आरोप लगाएको छ । 

गृह सुरक्षा विभागले हार्वर्डको नेतृत्व गर्नेहरूले अमेरिका विरोधी, आतंकवाद समर्थक आन्दोलनकारीहरूलाई धेरै यहूदी विद्यार्थीहरूलाई दुर्व्यवहार गर्न र शारीरिक रूपमा आक्रमण गर्न अनुमति दिएको समेत आरोप लगाएको छ ।

हार्वर्डले ट्रम्प प्रशासनको कार्यलाई गैरकानूनी भनेको छ । विश्वविद्यालयले हार्वर्डमा १४० भन्दा बढी देशका विद्यार्थीहरू रहेको र अन्तर्राष्ट्रिय विद्यार्थी र विद्वानहरूलाई भर्ना गर्ने हाम्रो क्षमता कायम राख्न पूर्ण रूपमा प्रतिबद्ध रहेको बताएको छ ।

विश्वविद्यालयले विद्यार्थीहरूलाई सहयोग गर्ने दिशामा काम गरिरहेको र यो प्रतिशोधात्मक कारबाहीले हार्वर्ड समुदाय र देशलाई गम्भीर हानि पुर्‍याउने चेतावनी दिएको छ । साथै यस कदमले हार्वर्डको शैक्षिक र अनुसन्धान अभियानलाई कमजोर पार्न खोजेको आरोप लगाएको छ ।

यसअघि मे २ मा अमेरिकी राष्ट्रपति डोनाल्ड ट्रम्पले हार्वर्ड विश्वविद्यालयको करमुक्त हैसियत अन्त्य गर्ने बताएका थिए । हाल ट्रम्पले हार्वर्डको २.२ अर्ब डलरको कोष फ्रिज गरेका छन् ।

ट्रम्प प्रशासनले विश्वविद्यालयलाई अक्टोबर २०२३ पछि क्याम्पसमा भएका यहूदी-विरोधी घटनाहरूको बारेमा सबै प्रतिवेदन र मस्यौदा सरकारलाई बुझाउन माग गरेको थियो ।

प्रशासनले यी प्रतिवेदनहरू तयार पार्ने सबै व्यक्तिहरूको नाम खुलासा गर्न र संघीय अधिकारीहरूलाई अन्तर्वार्ताको लागि उपलब्ध गराउन पनि चाहेको बताएको छ ।

यस आदेशविरुद्ध विश्वविद्यालयले अदालतमा मुद्दा पनि दायर गरेको छ । विश्वविद्यालयले ट्रम्प प्रशासनले राजनीतिक दबाब सिर्जना गरेर शैक्षिक कार्यलाई नियन्त्रण गर्न चाहेको आरोप लगाएको छ । हार्वर्डले यसले विश्वविद्यालयको संवैधानिक अधिकारको उल्लंघन गरेको आरोप लगाएको छ ।