एलन मस्कलाई ‘हनिट्रयाप’मा पार्न प्रयत्न गरिएको दाबी

काठमाडौं– अमेरिकाको फेडेरल ब्यूरो अफ इन्भेस्टिगेशन (एफबीआई)का एक पूर्वअधिकारीले अमेरिकी खर्बपति एनल मस्क र अर्का एक जनालाई रुसले हनिट्रयापमा पार्न अनेक प्रयास गरेको दाबी गरेका छन्।

एफबीआई पूर्वअधिकारी जोनाथन बुमाले रुसी गुप्तचर संस्था जीआरयूले सिलिकन भ्यालीका हस्तीहरूलाई प्रभावमा पार्न अनेकौं प्रयास गरेको जिकिर गरेका हुन्। रुसले यस्ता प्रयोग यसअघि पनि गरेका थिए। खासगरी अमेरिकी सैन्य अधिकारीमाथि यसअघि हनिट्रयापका प्रयास गरिएका थिए। 

खासगरी हनिट्रयापको उत्पत्ती नै रुसले अमेरिकी अधिकारीमाथि गरिएका महिलाको प्रयोगबाट भएको पनि मानिन्छ।

खासगरी एलन मस्क र भेञ्चर पुँजीकर्ता पीटर थिएल लगायतलाई प्रभावमा पार्न विशेष अपरेसनहरू सञ्चालन गरिएको बुमाले दाबी गरेका छन्। विशेष अपरेशनका क्रममा यौन, लागूपदार्थ र विलासी जीवनशैली समेतको प्रयोग गरिएको थियो ।

रुसी राष्ट्रपति भ्लादिमिर पुटिनको स्वीकृतिमा यो अभियान सञ्चालन भएको बुमाले जिकिर गरेका छन्। 

जर्मन सञ्चार संस्था जीडीएफसँगको कुराकानीका क्रममा बुमाको यस्तो दाबी आएको हो। जीआरयूले एलन मस्क र पीटर थिएलजस्ता प्रभावशाली व्यक्तिहरूलाई प्रभावमा पार्न ब्ल्याकमेलका लागि प्रयोग गर्न सकिने गोप्य र संवेदनशील सामग्री जम्मा गरेको थियो।

बुमाले जीडीएफको डकुमेन्टरीमा भनेका छन्, ‘मस्क महिलासँगको यौन सम्बन्ध र लागूपदार्थ (विशेष गरी केटामिन) प्रयोगप्रति आकर्षित भएको कुरा रुसी गुप्तचर एजेन्सीका लागि अवसरका रूपमा देखिएको थियो।’

बुमाले यसलाई पुष्टि गर्ने अनेक आधार रहेको दाबी समेत गरेका छन्। मस्कको बर्निङ म्यानजस्ता डेजर्ट पार्टीहरू, वयस्क मनोरञ्जन (एडल्ट इन्टरटेनमेन्ट), र जुवा खेल्ने रुचिलाई पनि रुसी सुरक्षाअधिकारीहरूले सम्पर्कको सम्भावित मार्ग बनाएको बुमा बताउँछन्।

बुमाले एलन मस्क र पुटिनबीच सम्भवतः धेरैपटक प्रत्यक्ष सम्पर्क भएको जानकारी आफूसँग रहेको दाबी गरेका छन्। सन् २०२४ मा वाल स्ट्रिट जर्नलले पनि मस्क र पुटिनबीच गुप्त कुराकानी भएको पुष्टि गरेको रिपोर्ट प्रकाशित गरेको थियो। त्यसअनुसार मस्क कम्तीमा सन् २०२२ देखि पुटिनसँग प्रत्यक्ष सम्पर्कमा थिए।

जीआरयू रूसको सबैभन्दा शक्तिशाली गुप्तचर निकायमध्ये एक हो जुन आक्रामक र गोप्य अन्तर्राष्ट्रिय अपरेसनहरूका लागि परिचित छ। यो निकायले विदेशी सैन्य अपरेसन र जासुसी गतिविधिलाई नियन्त्रण गर्छ।

मस्क अहिले अमेरिकी राष्ट्रपति डोनल्ड ट्रम्पका विशेष सल्लाहकार हुन्। उनको योजनाअनुसार नै ट्रम्पले विभिन्न निर्णय गरिरहेका छन्। मस्क सामाजिक सञ्जाल एक्सका सीईओ हुन्। उनी टेस्लाका पनि मालिक हुन्। अमेरिकी सरकारमा प्रभाव राख्ने भएकाले नै रुसले उनलाई हनिट्रयाप गरी प्रभावमा पार्न खोजेको आरोप पछिल्लो पटक सार्वजनिक भएको हो।