भारतको आक्रमणबाट ११ सैनिक र ४० सर्वसाधारण मारिए : पाकिस्तान

इस्लामावाद- गत साता भारतसँगको तनावका क्रममा भएको हवाई तथा स्थल सेनाको भिडन्तमा कम्तीमा पनि ११ जना सैनिक मारिएको पाकिस्तानले स्वीकारेको छ ।

पाकिस्तानी सेनाले भारतको उक्त ‘कायरतापूर्ण आक्रमण’को प्रतिकार गर्दै गर्दा कम्तिमा ११ जना पाकिस्तानी सैनिक मारिएको जनाएको छ ।

उक्त भिडन्तका क्रममा ७८ जना सैनिक घाइते भएको पाकिस्तानी सेनाको जनसम्पर्क शाखा (आईएसपीआर)ले मंगलबार विज्ञप्तिमार्फत् जानकारी दिएको छ ।

यसरी हताहती हुने गरी भएको सैन्य तनाव भारतले पाहलगाम आक्रमणको दोष पाकिस्तानमाथि लगाएको आरोपपछि सुरू भएको थियो ।

मे ६–७ को राति भारतले ‘अपरेसन सिन्दूर’ अन्तर्गत पाकिस्तानमा हवाई आक्रमण गरेको थियो। जसमा कयौँ सर्वसाधारणको मृत्यु पनि भएको थियो।

त्यसपछि दुवै देशबीच मिसाइल आक्रमण सुरू भएको थियो। जुन क्रम एक साता चल्यो । अन्ततः अमेरिकी हस्तक्षेपपछि दुवै देश युद्ध रोक्न सहमत भएको पाकिस्तानी अनलाइन डनले उल्लेख गरेको छ ।

शनिबार दुवै देशबीचको तनाव उच्चतम बिन्दुमा पुग्दा अमेरिकी राष्ट्रपति डोनाल्ड ट्रम्पले भारत र पाकिस्तानबीच युद्धविरामको घोषणा गरेका थिए।

आईएसपीआरका अनुसार, भारतको आक्रमणमा ४० जना नागरिक मारिएका छन् । जसमा ७ जना महिला र १५ बालबालिका पनि थिए । त्यसक्रममा १२१ जना घाइते भएका छन्।

मारिएका सैनिकहरू

नायक अब्दुल रहमान

लान्स नायक दिलावर खान

लान्स नायक इक्रामुल्लाह

नायक वकार खालिद

सिपाही मुहम्मद अदिल अकबर

सिपाही निसार

पाकिस्तानी वायु सेनाका

स्क्वाड्रन लिडर उस्मान युसुफ

प्रमुख प्राविधिक औरन्गजेब

वरिष्ठ प्राविधिक नजीब

कर्पोरल प्राविधिक फारूक

वरिष्ठ प्राविधिक मुबाशिर