पाकिस्तानलाई मोदीको चेतावनी : आणविक ‘ब्लाकमेल’ स्वीकार्य छैन

काठमाडौं- भारतीय प्रधानमन्त्री नरेन्द्र मोदीले कुनै किसिमको आणविक ‘ब्लाकमेल’ सह्य नहुने चेतावनी दिएका छन् ।

सोमबार राष्ट्रका नाममा सम्बोधन गर्दै प्रधानमन्त्री मोदीले पाकिस्तानलाई आफ्नो मुलुकले कुनै किसिमको आणविक ब्लाकमेल नसहने चेतावनी दिएका हुन् ।

उनले ‘पानी र रगत एकसाथ नबग्ने’ दोहो¥याउँदै आणविक हतियारको आवरणमा आतंकवादलाई स्वीकार गर्न नसकिने समेत उल्लेख गरे । प्रधानमन्त्री मोदीले पाकिस्तानसँग पाकिस्तान–अधिनस्थ कश्मीर र आतंकवादका विषयमा मात्रै कुरा हुने उल्लेख गरे ।

प्रधानमन्त्री मोदीले जसरी आतंककारीले आफ्ना दिदीबहिनीको सिन्दुर उजाडेका थिए, त्यसैगरी भारतले पनि आतंकका मुख्यालयहरू ध्वस्त पारेको टिप्पणी गरे । भारतले गरेका आक्रमणमा १०० भन्दा बढी खतरनाक आतंककारी मारिएको पनि मोदीले दाबी गरे।

भारत र पाकिस्तानबीच युद्धविराम भएको दुई दिनपछि प्रधानमन्त्री मोदीले राष्ट्रका नाममा सम्बोधन गरेका हुन् । यसअघि बुधबारमात्रै भारतले पाकिस्तानमा अपरेशन सिन्दुरका नाममा सैन्य कारवाही गरेको थियो ।

भारत प्रशासित जम्मु कश्मीरको पहलगाम क्षेत्रमा एक जना नेपालीसहित २६ जनाको ज्यान जानेगरी भएको आतंककारी आक्रमणपछि भारतले अपरेशन सिन्दुर सञ्चालन गरेको थियो ।