काठमाडौँ– सरकारले टीकापुर हत्याकाण्डमा मुख्य दोषी ठहर भएका रेशम चौधरीलाई छाड्ने तयारी गरेकोप्रति सत्तारुढ दलले नै आपत्ति जनाएको छ ।
सत्ता गठबन्धनकै एक घटक राष्ट्रिय जनमोर्चा आपत्ति जनाएको हो ।
राष्ट्रिय जनमोर्चाका अध्यक्ष चित्रबहादुर केसीले पार्टी विज्ञप्ति जारी गर्दै टीकापुर हत्याकाण्ड कुनै राजनीतिक नभएर आम नरसंहारको घटना भएको उल्लेख गर्दै आममाफी दिन नहुने धारणा राखेका छन् ।
‘त्यो घटनाका मुख्य नाइकेलाई गणतन्त्र दिवसको उपलक्ष्यमा आममाफी दिई कैद मिनाहा गराउन सरकारले अगाडि बढाएको प्रक्रिया आफ्नो सरकार टिकाउन गरिएको राजनीतिक लेनदेन वा सौदाबाजी मात्र हो,’ उनले भनेका छन् ।
टिकापुर हत्याकाण्डका नाइके वा संलग्नलाई आममाफी दिने कार्यले दण्डहीनता, अपराधको राजनीतिकरण र राजनीतिको अपराधीकरण बढ्ने भन्दै चौधरीलाई आममाफी दिनका लागि अगाडि बढाएको प्रक्रिया रोक्न सरकारसँग उनले मागसमेत गरेका छन् ।
२०७२ भदौमा टीकापुरमा ७ जना सुरक्षाकर्मी र एक नाबालकको हत्या भएको थियो । यस घटनाका मुख्य दोषी थारू अगुवा चौधरी भएको सर्वोच्च अदालतले ठहर गर्दै जन्मकैदको सजाय सुनाइसकेको छ ।
