काठमाडौँ– नेपाली कांग्रेसका नेता तथा सांसद डा. चन्द्र भण्डारीले आफ्नो उपचारको लागि सरकारले दिने भनेको रकमबाट जलन उपचार गर्ने अस्पताल खोल्न आग्रह गरेका छन् ।

आज प्रतिनिधि सभामा बोल्दै डा. भण्डारीले यस्तो बताएका हुन् । गत फागुन ४ गते निवासमा ग्यास सिलिण्डर विस्फोट भएपछि डा. भण्डारी घाइते भएका थिए । सोही घटनामा परी उनकी आमाको भने निधन भएको थियो ।

आगलागीबाट घाइते भएका डा. भण्डारीको नेपालमा उपचार हुन नसकेपछि भारतको मुम्बइमा लगेर उपचार गरिएको थियो । उपचारपछि निको भएर डा. भण्डारीले आज पहिलो पटक संसदमा आफ्नो धारणा राखेका हुन् ।

संसदमा बोल्दै डा. भण्डारीले नेपालमा जलनको उपचार गर्ने स्तरीय अस्पताल आवश्यक भएको उनको भनाइ छ । डा. भण्डारीको उपचारमा लागेको खर्च सरकारले व्यहोर्ने भनिएको थियो । डा. भण्डारीले आफ्नो उपचार खर्चले जलनको उपचार गर्ने स्तरीय अस्पताल खोल्न डा. भण्डारीले आग्रह गरे । 

सरकारले आफूलाई उपचार खर्च दिएमा सो रकम पनि जलनको उपचार गर्ने अस्पताल खोल्नको लागि प्रयोग गर्ने उनको भनाइ छ ।