काठमाडौं– खेलको अन्तिम पाँच मिनेट सम्हालिन नसक्दा सहिद स्मारक ‘ए’ डिभिजन लिगमा फ्रेन्ड्स क्लबले चर्च ब्वाइज युनाइटेडसँग २–१ को हार बेहोरेको छ ।

त्रिपुरेश्वरस्थित दशरथ रंगशालामा सम्पन्न खेलको १४औँ मिनेटमा बेन क्वेन्सले गरेको गोलबाट फ्रेन्ड्सले अग्रता बनाएको थियो । 

७ औँ मिनेटमा अञ्जन विष्टले पेनाल्टीमार्फत गोल गर्दै चर्च ब्वाइजलाई खेलमा फर्काएका थिए । फ्रेन्ड्सका ‘स्कोरर’समेत रहेका क्वेन्सले १ यार्ड बक्सभित्र रञ्जित पान्द्रेलाई तानेर लडाएपछि चर्चले पेनाल्टी पाएको थियो । जसमा अञ्जनले कुनै गल्ती गरेनन् । खेलको इन्जुरी समयमा आशीष चौलागाईंले गरेको गोल निर्णायक बन्यो ।

जितसँगै १४ खेलबाट २४ अंक जोडेको चर्च ब्वाइज तालिकाको दोस्रो स्थानमा उक्लिएको छ । समान खेलबाट १५ अंक जोडेको फ्रेन्ड्स रेलिगेसन क्षेत्रमा झरेको छ ।

लिगमा  अर्को खेलमा हिमालयन शेर्पा क्लबले सातदोबाटो युथ क्लबविरुद्ध १–० को जित निकाल्दै रेलिगेसन क्षेत्रबाट उक्लिएको छ । 

च्यासल रंगशालामा खमिर गिल्सेन कन्दन्वाले ६५औँ गरेको गोल निर्णायक बन्दा हिमालयन शेर्पा रेलिगेसन क्षेत्रबाट उक्लियो ।

जितसँगै १४ खेलबाट १७ अंक जोडेको आठौँ स्थानमा उक्लिएको छ । समान खेलबाट २२ खेलबाट २२ अंक जोडेको सातदोबाटो युथ क्लब चौथो स्थानमा झरेको छ ।