लोकगायिका माया गुरुङ सम्मानित

काठमाडौं - गाउँशहरमा लमजुङ दरवार गित गाएर चर्चित बनेकी गायिका लमजुङे चेली माया गुरुङ सम्मानित भएकि छन्  । 

गण्डकी प्रज्ञा प्रतिष्ठानले आफ्नो स्थापना दिवसका अवसरमा गुरुङ सहित प्रदेश अन्तर्गतका विभिन्न क्षेत्रमा स्थापित सातजना श्रष्टालाई सम्मान गरेको छ । 

प्रतिष्ठानको दोस्रो वार्षिकोत्सवको अवसरमा औपचारिक कार्यक्रमका विच श्रष्टालाई सम्मान गरीएको प्रतिष्ठानले जनाएको छ । आधुनिक प्रविधिको अभावका बाबजुत पनि गुरुङले लोक गित क्षेत्रमा पुर्‍याएको योगदानलाई कदर गर्दै गुरुङलाई गण्डकी प्रतिष्ठान नारी सम्मानबाट नगद ५० हजारको साथमा सम्मानपत्र र दोसल्ला ओढाइ सम्मान गरिएको हो । 

प्रतिष्ठानका अनुसार गण्डकी प्रज्ञा संस्कृति सम्मानबाट कास्कीका तीर्थ श्रेष्ठ, गण्डकी प्रज्ञा साहित्य सम्मानबाट पर्वतका शान्तिनारायण श्रेष्ठ, गण्डकी प्रज्ञा सङ्गीत सम्मानबाट स्याङ्जाका अम्मर पोखरेली, गण्डकी प्रज्ञा कला सम्मानबाट तनहुँका आलोक गुरुङलाई नगद एक लाख, सम्मानपत्र प्रदान गरी दोसल्ला ओढाई सम्मान गरिएको हो । त्यस्तै गण्डकी प्रज्ञा युवा सम्मानबाट मोतीबहादुर कार्की र लक्ष्मी थापालाई नगद २५ हजारको साथमा सम्मानपत्र र दोसल्लाले सम्मान गरिएको प्रतिष्ठानले जनाएको छ ।

१२ बर्षको सानै उमेरदेखि लोकगीत गाउन थालेकी माया बेसीशहर ५, नाल्माको स्थायी बासिन्दा हुन्  । गाउँघरमा हुने रोधीबाट आफ्नो सांगीतिक यात्रा शुरु गर्नुभएकी गुरुङले २०४५ साल फागुन ७ गते प्रजातन्त्र दिवसको अवसरमा रेडियो नेपालले आयोजना गरेको लोकगीत प्रतियोगितामा ‘गाउँसहरमा लमजुङ दरबार’ गीत गाएर प्रथम भएकी थिइन्  । त्यसपछि गुरुङले ‘सैलुङ्गे डाँडा नाल्माको..., माया सरर..., खुर्पेटो डोकोले....’ लगायत करीब दुईसय गीत गाएकी छन। गुरुङले छिटफुट बाहेक विभिन्न गित सहितका ११ वटा एल्बम नै निकालेकी छन् । 

गुरुङ यसअघि राष्ट्रिय लोकदोहोरी गित प्रतिष्ठान गण्डकी प्रदेश, जिल्लामा हुने विभिन्न महोत्सव, जिल्लाका विभिन्न संघ संस्थाबाट पनि सम्मानित भएकि थिइन्  ।