अनधिकृत संरचनामा चल्यो डोजर

मंगलबार, चैत ७, २०७९

बैतडी –बैतडीको पाटन बजारमा रहेका अनधिकृत संरचना नगरपालिकाले डोजर प्रयोग गरेर हटाउन थालेको छ । पाटन नमुना शहर क्षेत्रमा नयाँ सडक निर्माण गर्न अनधिकृत संरचना हटाउन शुरु गरिएको नगरप्रमुख गौरीसिंह रावलले जानकारी दिए ।

नगरपालिकाले बजारबाट नयाँ बसपार्क जोड्ने सडक र विमानस्थल जोड्ने शाखा सडक निर्माण गर्न त्यस क्षेत्रमा बनेका संरचना हटाउन थालेको हो । त्यस क्षेत्र जोड्ने सडकको क्षेत्राधिकारभित्र पर्ने नगर विकासको जमिनमा बनेका अस्थायी संरचना हटाउन थालिएको नगरप्रमुख रावलले बताए ।

उनले भने, ‘अनधिकृत रूपमा बनेका संरचना हटाउन नगरपालिकाले पुसमै ३५ दिने सूचना जारी गरेको थियो ।सूचनाको अवज्ञा गरेपछि डोजर प्रयोग गरेका हौं । अब नयाँ शहरको कामले गति लिने विश्वास गरेका छौं ।’ 

सडक ५ मिटरसम्मको चौडा बनाइन लागिएकाले अनधिकृत संरचना हटाउन थालिएको हो । पाटन नयाँ शहर आयोजना कार्यालयका सूचना अधिकारी इन्जिनियर रोहितराज भण्डारीका अनुसार सडक चौडा गर्न ५ करोड रुपैयाँको ठेक्का भइसकेको छ ।

सरकारले आर्थिक वर्ष २०६७÷०६८ सालमा मध्यपहाडी लोकमार्गअन्तर्गत १० शहरलाई नमुनाका रूपमा विकसित गर्ने निर्णय गरेको हो । तिनै १० नमुना शहरमध्ये १० औँ शहरको रूपमा बैतडीको पाटनलाई विकसित गर्ने निर्णय भएको थियो ।

गत आर्थिक वर्षमा आधा बजेट समेत खर्च नभएपछि चालू आवमा बजेट घटेर आएको छ । चालू आवमा १२ करोड ९२ लाख रुपैयाँ बजेट आएको कार्यालयले जनाएको छ । 

जग्गा एकीकरणका लागि जग्गाधनीले जग्गा उपलब्ध नगराउँदा काम अघि बढ्न सकेको छैन । जग्गा एकीकरण प्रक्रियामा स्थानीयले योजना सम्पन्न हुँदासम्म नयाँ शहरी विकासको कार्यालयलाई लालपुर्जासहित जग्गा हस्तान्तरण गर्नुपर्ने हुन्छ । त्यस ठाउँमा नयाँ शहरी विकासको कार्यालयले उपयुक्त बसोवासका लागि घर, खानेपानी, खेल्ने चौर, विद्युतीकरणदेखि सुविधासम्पन्न भौतिक संरचना बनाएर त्यसपछि ती जग्गाधनीलाई नै हस्तान्तरण गर्ने कार्यक्रम छ ।

पाटन बजार क्षेत्र आसपासका क्षेत्रमा जग्गा छनोट गरिए पनि कृषियोज्ञ जमिन नदिने बताएपछि काम रोकिएको छ ।

१ लाखभन्दा बढी मानिसको बसोवास गराउने र आधुनिक सुविधासहित व्यवस्थित शहर बनाउने निर्णय हुँदा पाटनवासी खुशी भएका थिए । तर, १२ वर्ष बितिसक्दा समेत यो शहरमा विकास निर्माणका कामले खासै गति लिन नसकेकोमा निराशा छाउँदै गएको स्थानीय दिनेश बिष्टको भनाइ छ ।

विभिन्न पर्यटकीय सम्भावना बोकेको पाटन शहरको विकास भएपछि यस क्षेत्रका युवालाई प्रशस्त रोजगारीका सम्भावना प्राप्त हुनेछ । अहिले बैतडीबाट हजारौँ मानिसले तराईतिर बसाइँसराइ गरिरहेको र हजारौँ युवा विदेश गइरहेका वेला पाटन नै नयाँ शहर बनिसकेपछि यस अवस्थाको अन्त्य हुने जनाइएको छ ।

पाटनलाई २०८८ सालभित्र नयाँ शहरका रूपमा विकास गरिसक्ने लक्ष्य राखिए पनि त्यस अवधिमा सम्पन्न हुनेमा आशंका गरिएको छ ।
 

प्रकाशित मिति: मंगलबार, चैत ७, २०७९  १४:५५
प्रतिक्रिया दिनुहोस्