काठमाडौँ– टर्कीको भूकम्प प्रभावित क्षेत्रबाट १३ जना नेपाली सम्पर्कमा आएका छन् ।

उनीहरू अध्ययन र रोजगारीका लागि त्यहाँ पुगेको पाकिस्तानस्थित नेपाली दूतावासले जनाएको छ । टर्कीमा रहेका नेपालीहरू समस्यामा परे पाकिस्तानको दूतावासले हेर्दै आएको छ ।   

सम्पर्कमा आएका १३ नेपालीलाई गैरआवासीय नेपाली संघ (एनआरएनए) को सहयोगमा सेल्टर हाउस र होटलमा राखिएको दूतावासले जनाएको छ । 

भूकम्प प्रभावित क्षेत्रमा करिब ६० देखि ७० जनाको हाराहारीमा नेपाली हुन सक्ने र उनीहरू सुरक्षित स्थानमा सरिसकेको दूतावासले जनाएकोे छ । 

टर्कीको भूकम्पमा अहिलेसम्म नेपाली हताहत भएको सूचना नपाएको र नेपालीहरूको अवस्था बुझ्ने काम भइरहेको पाकिस्तानस्थित नेपाली दूतावासका राजदूत तपस अधिकारीले जानकारी दिए । 

सम्पर्कमा आएकाहरू सबै सुरक्षित स्थानमा रहेको र भूकम्प प्रभावित क्षेत्रमा रहेका नेपालीलाई सुरक्षित स्थानमा सारिएको उनले बताए ।

प्रभावित क्षेत्रका नेपालीलाई खानाको व्यवस्था पनि स्थानीय नगरपालिका र रेडक्रस सोसाइटीलगायत संघसंस्थाले गरिरहेको जानकारी पाएको उनको भनाइ छ । 

उनले भने, ‘भूकम्प प्रभावित क्षेत्रमा बाटो बन्द भएको ठाउँबाट सेनाको हेलिकोप्टरले पनि अत्यावश्यक वस्तुहरू लगिरहेको सूचना आएको छ । नगरपालिकाले पनि खाना, कपडालगायत अत्यावश्यक कुराहरूको व्यवस्था गरिरहेको छ ।’

भूकम्पमा कोही पनि नेपाली परेकोबारे औपचारिक जानकारी नआएको उनको भनाइ छ । 

भूकम्प गएकै दिन सोमबारदेखि एनआरएनए टर्कीको समन्वयमा प्रभावित क्षेत्रमा रहेका नेपालीको खोजी भइरहेको दूतावासले जनाएको छ । 

दूतावासका अनुसार टर्कीमा कति नेपाल छन् भन्ने यकिन तथ्यांक नभएको र ३ हजारको हाराहारीमा टर्कीमा नेपाली रहेको दूतावासको अनुमान छ ।

टर्की र सिरियाको सिमानामा सोमबार बिहान ७ दशमलव ८ र दिउँसो ७ दशमलव ५ रेक्टर स्केलको भूकम्प गएको थियो । भूकम्पपछि त्यहाँ परकम्पहरू पनि गइरहेका छन् । यो रिपोर्ट तयार पार्दासम्म टर्कीमा भूकम्पबाट ८ हजार ७०० जनाले ज्यान गुमाएको बिबिसीले जनाएको छ ।

भूकम्प प्रभावित क्षेत्र टर्कीको राजधानी स्तानबुलबाट झन्डै १२ सय किलोमिटर टाढा छ । जसका कारण सूचनाको पहुँच कम भएका कारण भूकम्पमा परी ज्यान गुमाएका र घाइते भएकाहरू कुन देशका नागरिक हुन् भनेर अहिलेसम्म टर्की सरकारले भनेको छैन । 

भूकम्पका कारण कतिपय स्थानमा इन्टरनेट र बिजुली बत्ती नहुँदा मोबाइल चार्ज नभएर पनि सम्पर्क समेत टुटेको बिबिसीले जनाएको छ ।