साउदीले आफ्नै नागरिकलाई प्राथमिकता दिएसँगै घट्यो नेपालको श्रमिक कोटा

सोमबार, माघ ९, २०७९
सोमबार, माघ ९, २०७९

काठमाडौँ– २०२३ मा साउदी अरबको श्रम, रोजगार तथा व्यवस्थापन मन्त्रालयले ‘समृद्धिका लागि देशभित्र रोजगारी’ भन्ने स्किम ल्याएको छ । 


साउदीले ल्याएको यो स्किम आप्रवासी श्रमिकको सट्टामा आफ्ना नागरिकलाई रोजगारीमा ल्याउने रणनीति भएको साउदी गजेट पत्रिकाको एक रिपोर्टमा उल्लेख छ । 


साउदीले सन् २०२२ मा मात्रै १ लाख ८८ हजार आफ्ना नागरिकलाई आन्तरिक रोजगारीमा प्रवेश गराएको थियो । जसमध्ये दैनिक १ हजार ३०० जना स्थानीय नागरिक आफ्नै घरनजिकको रोजगारदाता कम्पनीको रोजगारीमा जोडिन थालेको साउदी राष्ट्रिय रोजगारी सिर्जना नीतिको प्रतिवेदनलाई उद्धृत गदै साउदी गजेट पत्रिकामा उल्लेख छ ।


उक्त रिपोर्टमा सन् २०२१ को तुलनामा २०२२ मा स्थानीयलाई रोजगारीमा जोड्ने क्रम ५.४५ प्रतिशतले बढेको रिपोर्टमा जनाइएको छ ।


अहिले दैनिक ५०० भन्दा धेरै महिला रोजगारीमा जोडिन थालेको पत्रिकामा भनिएको छ । गत शनिवार सार्वजनिक गरेको रिपोर्टमा साउदीका नागरिक स्थानीय रोजगारीमा रमाउन थालेको समेत बताइएको छ । रोजगारीमा जोडिने महिलाको सङ्ख्या उल्लेख्य छ ।
साउदीमा अहिले २५ वटा देशका करिब १ करोड २० लाख आप्रवासी श्रमिक रहेको साउदीकै अध्यागमन विभागको तथ्याङ्क छ । साउदीले २०२५ सम्म विदेशी श्रमिकको सङ्ख्या ३५ प्रतिशत घटाएर आफ्नै नागरिकलाई रोजगारी दिने लक्ष्य ५ वर्षीय आर्थिक विकास कार्यक्रममा राखेको छ । 


साउदी अरबले देशको अर्थतन्त्र बलियो बनाउन पनि आप्रवासी श्रमिकमाथिको निर्भरता कम गर्ने नीति अघि सारेको छ । साउदीले आफ्नो देशभित्र रोजगारी गर्ने इच्छा भएका नागरिकलाई भत्तासहित १ वर्ष तालिमसमेत दिने गरेको छ । 


पछिल्लो समय साउदीका हरेक रोजगारदाता कम्पनीले साउदीका नागरिकलाई उच्च पदमा ३० देखि ३५ प्रतिशत कोटा छुट्याउन थालेको वैदेशिक रोजगार व्यवसायी सङ्घका महासचिव मेघनाथ भुर्तेलले जानकारी दिए । 


२ वर्षयता साउदीमा कलकारखाना, उद्योग, उत्पादन, सपिङ मल र अन्य क्षेत्रका उच्च पदमा ४० प्रतिशत साउदीकै नागरिकलाई प्राथमिकता दिन थालिएको छ ।


यो नियम लागू हुँदै गएपछि विदेशी कामदारलाई कम कोटा साउदीका रोजगारदाताहरूले छुट्याउन थालेको उनले बताए ।

 
‘साउदीबाट अहिले श्रमिकको माग आए पनि धेरै नै कटौती हुन थालेको छ । जसका कारण साउदी जाने श्रमिकको सङ्ख्या बिस्तारै घट्दै जाने छ । यसले पनि वैदेशिक रोजगारी क्षेत्रमा असर पर्छ,’ उनले भने, ‘पछिल्लो समय साउदी नागरिकको आफ्नै देशभित्र रोजगारीमा आकर्षण बढेसँगै अन्य देशको रोजगारी गरेको हो । यो साउदीको राष्ट्रिय नीति भएका कारण रोजगारी व्यवसाय मारमा पर्छ भन्न मिल्दैन ।’


साउदीले विदेशी कामदारको कोटा कटौती गर्दै जान थाले यसको विकल्पमा नयाँ रोजगारदाता देश खोज्नुपर्ने उनको भनाइ छ । 
२०२० देखि साउदीले आप्रवासी श्रमिकमाथि दीर्घकालीन निर्भरता हटाउने लक्ष्य लिएको थियो । उक्त लक्ष्यअनुसार बङ्गलादेश, पस्कितान र श्रीलङ्काका श्रमिकको माग साउदी सरकारले कटौती गर्न थालेको साउदी श्रमिक पठाउँदै आएका म्यानपावर व्यवसायीहरू बताउँछन् । 


कोरोना महामारीपछि साउदी रोजगारीमा गएका नेपाली कामदार समस्यामा पर्ने थालेको वैदेशिक रोजगार विभागले जनाएको छ । 
साउदीमा अलपत्र परेका नेपाली कामदारलाई त्यहाँका कम्पनीले परिचयपत्र (अकामा) नबनाइदिने, समयमा तलब नदिने, खाने–बस्ने राम्रो सुविधा नदिने, स्वदेश फर्किन टिकट नदिने र करार पत्र रद्द गरिदिने समस्याको उजुरी आइरहेको विभागले जनाएको छ । 
रोजगारीका लागि साउदी अरब गएका नेपाली श्रमिक धेरै समस्यामा पर्ने गरेका छन् ।


गत आर्थिक वर्षमा १ लाख २० भन्दा बढी नेपाली युवायुवती रोजगारीका लागि साउदी पुगेको विभागको तथ्याङ्क छ । 
चालु आर्थिकको सुरुको ५ महिनामा ५० हजार नेपाली साउदी पुगेको विभागले जनाएको छ । हाल साउदीमा करिब ४ लाख नेपाली कार्यरत रहेको विभागको अनुमान छ । 

प्रकाशित मिति: सोमबार, माघ ९, २०७९  ०६:५८
प्रतिक्रिया दिनुहोस्
सिएन विशेष