खोटाङमा प्रहरीले चिहानबाट दिदीभाईको गाडेको शव निकाल्नुको कारण

दिक्तेल– खोटाङको दिप्रुङ चुइचुम्मा ३ छोरम्बुका गोविन्द बस्नेत (नवराज) की ११ वर्षीया छोरी मेनिषा र ६ वर्षीय छोरा मेघराजको शव प्रहरीले आइतबार खनेर चिहानबाट निकालेको छ।

प्रहरीले गाडिएको शव निकाल्नुको कारण हो, पोस्टपार्टम नगरिनु। उक्त शवहरु पोस्टमर्टमका लागि सदरमुकाम ल्याइएको छ।

बालबालिकाका बुवालाई बोलाएर प्रहरीले शव पोस्टमार्टमका लागि पठाएको हो। सोमबार रातिसम्म पोस्टमार्टम भएको थिएन।

दुर्घटना वा आत्महत्याका घटनामा ज्यान गुमाएकाहरूको अनिवार्य शव परीक्षण गर्नुपर्ने कानुनी प्रावधान पूरा गर्न प्रहरीले शव उत्खनन् गरेर नियन्त्रणमा लिएको उनले जानकारी दिए।

उनीहरुको भीरबाट लडेर मृत्यु भएको बताइएको थियो। 

दिप्रुङ चुइचुम्मा ३ का वडाध्यक्ष भूपेन्द्र बस्नेतले प्रहरीले शव उत्खनन् गरेर पीडित परिवारलाई झनै दुःख दिएको भन्दै गुनासो गरेका छन्। वडाध्यक्ष बस्नेतले दिएको जानकारी अनुसार साउन २२ गते बिहीबार बिहान गोविन्दको घरमा डिसहोम जडान गरिएको थियो। गाउँकै शान्ति निकेतन मिनाकर्ण माध्यमिक विद्यालयमा कार्यालय सहयोगीका रूपमा काम गर्ने गोविन्द स्कुलतिर लागेका थिए। 

डिसहोम जडानको कामले त्यसदिन ढिला भएपछि उनी हतारहतार स्कुल लागेका थिए। स्कुल पुगेर कोठाहरू खोल्ने, सरसफाइ गर्नुपर्ने जिम्मा भएका उनी हिँडेपछि उनका दुई छोरी र १ छोरा स्कुल पुगेनन्।

छोराछोरी खोज्दै जाने क्रममा बुबा गोविन्दले सापतेलको जंगलभित्र रहेको खरूवा खोला नजिकै छोरीको शव फेला पारेका थिए भने त्यहाँभन्दा केहीमाथि छोराको शव भेटिएको थियो। 

त्यसदिन रातभरी गाउँलेले रुँघेर भोलिपल्ट शुक्रबार उनीहरूको अत्येष्टि गरेका थिए। सदरमुकामबाट २५ कोस टाढा रहेको गाउँका सबैले भीरबाट लडेर बालबालिकाले ज्यान गुमाएको ठहर गरेपछि उनीहरूको अन्त्येष्टि भएको थियो। 

तर प्रहरीले त्यसलाई कानुनी प्रक्रिया पूरा गर्नका लागि उत्खनन् गरेको छ।