कहाँ हराए विश्वप्रकाश र गगन थापा ? चालचुल छैन त

गगन थापा र विश्वप्रकाश दुवै सत्तारूढ दल तथा संसदकै सबै भन्दा ठुलो दलको महामन्त्री हुन् । उनीहरू अहिले महामन्त्रीमा छन् र त्यतिमा नै रोकिदैनौँ, देशको नै बागडोर सम्हाल्छौँ भन्नेमा देखिन्छन् । गगन थापाको त मिसन प्रधानमन्त्री भन्ने अनौपचारिक अभियान नै देखिन्छ । तर यी दुई महामन्त्रीहरू राष्ट्रिय राजनीतिमा यसरी हराइरहेका छन् कि सामाजिक सञ्जालमा यी दुवैको खोजी हुन थालेका छन् । 

१. संसदमा भेटिदैनन्, भेटिए पनि जिम्मेवार भेटिएनन्

सबैभन्दा कम संसद बैठकमा सामेल हुनेहरूको सूचिमा यी दुवै महामन्त्रीहरू पर्छन् । संसदमा जादैनन् । 

संसदमा धेरै नजानुलाई पनि उनीहरूले बचाउ गर्थे । भन्थे, हामी संख्यात्मकरूपमा कम जान्छौँ तर हाम्रो थोरै उपस्थिति पनि गुणात्मकरूपमा महान् छ । तर पछिल्लो पटक रामहरि खतिवडा सभापति रहेको संसदीय समितिले कर्मचारीलाई जागिर छोड्ने बित्तिकै राजनीतिक नियुक्ति लिन बन्द गर्ने प्रस्ताव गरेको विधेयक प्रतिवेदनमा समितिले दिएको सिफारिसको उल्टो लेखियो । 

समितिले कम्तिमा २ बर्ष पछि मात्र राजनीतिक नियुक्ति लिन पाउने भन्ने निर्णय गरेको थियो तर प्रतिवेदनमा त्यो हटाइएको थियो । त्यसमा दुवै महामन्त्रीको हस्ताक्षर थियो । यसले उनीहरूले भने जस्तो गुणात्मक उपस्थितिको खिल्ली उडायो । 

दुवै महामन्त्रीले कानून बनाउने विधेयक प्रतिवेदन पढ्दै नपढी हस्ताक्षर लगाउँदा रहेछन् भन्ने आमसर्वसाधारणसम्म कुरा पुग्यो । त्यसपछि दुवै महामन्त्रीहरू झन् गायब भएका छन् ।

२. समसामयीक राजनीतिक बिषयमा मुखमा दहि जमाएर बसेका छन्

विश्व प्रकाश र गगन थापा यस्ता युवा भनिएका नेताहरू हुन्, जोसँग समसामयीक राजनीतिक बिषयवस्तुका बारेमा बोल्ने प्रशस्त जाँगर हुन्थ्यो । उनीहरू पार्टीकै नेताका विरूद्धमा पनि बोल्थे । संसदमा कुर्लिन्थे ।

तर अहिले यसरी मौन छन् कि मानौँ, विश्वप्रकाश र गगन थापाले मुखमा दहि जमाएर बसेका हुन् । 

समितिबाट अर्कै विधेयक प्रतिवेदन जान्छ, विश्वप्रकाश र गगन थापाको बोली बन्द । गृहमन्त्री नै भिजिट भिसाको डिलमा जोडिएको भनेर संसदमा कुरा उठ्छ, विश्वप्रकाश र गगन थापाको बोली बन्द । मन्त्रीहरूका पालैपिलो भ्रष्टाचारका अडियो सार्वजनिक हुन्छ, विश्वप्रकाश र गगन थापाको बोली बन्द । बागमती प्रदेशमा कांग्रेसकै सरकार कांग्रेसकै अर्को समूहले ढाल्छ, विश्वप्रकाश र गगन थापाको बोली बन्द । 

विश्वप्रकाश र गगन थापाको यस्तो अवस्था कहिलै पनि थिएन । उनीहरू बोल्थे तर त्यति बेला उनीहरू सत्ताको टाढा हुन्थे । अहिले दुवै जना शेखर कोइराला छोडेर देउवा दम्पतितिर लागेका छन् । आउँदो अधिवेशनमा देउवा दम्पतिकै गुटबाट दुवैलाई पदको जोहो गरिसक्नु छ । 

३. रवि लामिछाने विरूद्धको प्रमाण भनेको कागज हरायो ?

रवि लामिछाने गृहमन्त्री हुँदा भने संसदमा खुब जान्थे र कागज हल्लाउँदै रवि लामिछानेले सहकारी ठगेको प्रमाण हामीसँग छ भन्दै चिच्याएर भाषण गर्थे । तर त्यो प्रमाण कहिलै सार्वजनिक भएन । 

अहिले सर्वसाधारणले उनीहरूलाई जहाँ भेट्यो त्यहाँ, खोइ त प्रमाण भनेर सोध्न थालेका छन् र उनीहरू माइक र प्रश्न छलेर भाग्न थालेका छन् । त्यसका भिडियोहरू सामाजिक सञ्जालमा छरिन थालेका छन् । 

त्यसमाथि रवि लामिछानेमाथि जुन जुन आरोप लगाइयो, त्यसको बलियो प्रमाण कतै पनि भेटिएको छैन । अदालतले लामै समय थुन्न सक्ने देखिए पनि प्रमाण बलियो नहुदा रवि लामिछानेप्रति राजनीतिक प्रतिशोध भएकै हो भन्नेमा जनमानस पुगेको देखिन्छ । त्यसले विश्वप्रकाश र गगन थापालाई अफ्ठ्यारोमा पारेको छ ।

त्यसबेला संसदमा ठूलो ‘ड्रामा’ बनाएर बोलिएको कुरा पछिल्लो परिणाममा असत्य सावित हुन थालेपछि, यी दुवैको विश्वासनीयता नै प्रश्नमा परेको छ ।

 ४. ‘विपक्षी नेता’को पहिरन फेरेर ‘सत्ताको आरामकुर्सी’मा

गगन र विश्वप्रकाशको पहिचान एक समय ‘निर्भीक युवा नेता’को थियो । उनीहरूले दलका वरिष्ठ नेताहरूलाई पनि संसदमा घोचपेच गर्न छोड्दैनथे । तर त्यो समय उनीहरू सत्ताको वरिपरि थिएनन् ।

आज उनीहरू सत्तामा छन् । ठ्याक्कै भन्नुपर्दा, पार्टीको सबैभन्दा बलियो गुटसँग । यसैले हो कि, जोसिला विरोधी स्वरहरू अब सत्ता–सहयोगी मौनतामा बदलिएका छन् । राजनीतिमा यो नयाँ होइन, तर यी दुईबाट यस्तो हुने अपेक्षा कम थियो ।

अनि यही कारणले, पुराना समर्थकहरू पनि अहिले सोच्नु पर्ने भएको छ कि नेपाली राजनीतिमा विश्वप्रकाश र गगन थापाहरू कम उमेरमा बुढा नेताहरू मात्र त हैनन् ?

यहि छ प्रमाण भनेर कागज हल्लाएर संसदमा देखाउँदा तत्कालिन अवस्थामा रवि लामिछानेविरूद्धमा बलियो सन्दर्भ त बन्यो तर त्यहि कुरा गगन थापा र विश्वप्रकाशहरूले त्यसै बोलेका रहेछन् भन्ने पर्दा उनीहरूलाई नै अफ्ठ्यारोमा पुर्याएको छ । 

यसबाट कांग्रेसका महामन्त्रीद्धय विश्वप्रकाश र गगन थापाका बारेमा भन्न थालेका छन्, विश्वप्रकाश र गगन थापा संसदमा भेटिदैनन्, भेटिए पनि जिम्मेवार भेटिएनन् ।