विवादीत बनेर सरुवा हुँदा पनि सीडिओ नै बन्ने ‘शक्तिशाली यादव’

काठमाडौं– गृह प्रशासन अन्तर्गत रहेका सह–सचिव इन्द्रदेव यादव नेपथ्यका शक्तिशाली कर्मचारी रहेको पुष्टि भएको छ।

हाल मोरङ जस्तो क बर्गको जिल्लामा प्रमुख जिल्ला अधिकारी (सीडीओ) रहेका उनी शक्तिशाली यसकारण हुन् कि विवादीत हुँदा पनि जिल्लाकै कमान्डमा पुग्छन्। 

सुनसरीको बर्जुतालमा भएको हिंसाका क्रममा सो जिल्लाको कमान्ड गरेका यादवको सरुवाको माग भयो। 

उनी मिलाएर फेरि सीडिओ बनी इलाम पुगेका थिए। उनी सेवा कालमा ‘ख’ बर्गको जिल्ला पुगेको इलाम मात्र हो तर इञ्चार्जका रुपमा नै पुगेका थिए। 

उनी मन्त्रालयमा केही महिना पनि बस्दैनन्। गृह मन्त्रालयमा उनको शक्तिशाली छविको चर्चा हुने गरेको छ। जुन सरकार बने पनि लगत्तै उनी सीडिओ बनेर जिल्लामा पुगि हाल्छन्। 

इलामपछि तत्कालिन गृहमन्त्री रवि लामिछानेले उनलाई निर्वाचित भएको चितवन जिल्लाको सीडिओ बनाए। 

रविको कार्यकालभरी चितवनमा बसेका उनलाई रमेश लेखक गृहमन्त्री भएर आएपछि केही समय मन्त्रालयमा राखे पनि फेरि यादवको शक्ति देखियो।

उनलाई क बर्गको मोरङ जिल्लामा खटाइयो। 

सिरहाका मूलवासी उनी हाल सोही जिल्लामा कार्यरत रहेका छन्। 

यादव लगातार चार जिल्लाका सीडीओ बनिसकेका छन्। यसक्रममा त क बर्गका तीन जिल्लामा उनी सीडिओका रुपमा कायम छन्। 

त्यसअघि पनि उनले सीडिओका रुपमा नै रौतहट र सर्लाही जस्ता क बर्गका जिल्लामा पोस्टिङ मिलाएका थिए। 

नेपालमा जिल्ला प्रशासन कार्यालय र त्यसका प्रमुख भनेको जिल्लामा रहेका सबै सरकारी कार्यालयको कमान्ड गर्ने अधिकारी हुन्छ। एक हिसाबले प्रशासनयन्त्रको दृष्टिले हेर्दा अर्धन्यायीक निर्णयको अधिकारी। 

त्यसैले शक्तिशाली पद हुने भएकाले यादवले जुनसुकै सत्ता समीकरणमा पनि आफूलाई अब्बल हैन, शक्तिशाली कायम गरेर सीडिओको जिम्मेवारी लिने गरेका छन्। 

सर्लाहीमा उनी सीडिओ हुँदा हिंसा भड्किएको थियो। ०८० सालमा भएको साम्प्रदायिक हिंसा हुँदा यादव सर्लाहीका सीडिओ रहेका थिए। उनले त्यसबारे तथ्याङ्क दिन नसकेपछि सोधिएको प्रश्नमा भनेका थिए,‘तथ्यांक संकलन र अनुसन्धान गर्ने काम जिल्ला प्रहरी कार्यालयको हो। हामीले प्रहरीलाई मौखिक लिखित सबै अनुरोध गरेका छौँ।’ 

उनले गैर जिम्मेवार हिसाबमा उत्तर दिँदै भनेका थिए,‘हिजो ‘मोहम्मद डे’सम्म हामी त्यसैको व्यवस्थापनमा अल्झिएका थियौँ। मेरो काम समन्वयकारी भूमिकामा बसेर विविध वैठकहरु आयोजना गर्ने, त्यसमा सहभागी हुने हो। तर, पनि प्रहरीलाई मैले सबै पक्षतर्फ भएको क्षतिबारे, घटनाको मूल कारणबारे, कहिले भएको हो लगायत सबै विषयको अनुसन्धान गरेर रिपोर्टिङ लिन र त्यसको मुचुल्का तयार पार्न लगाएको छु।’ 

हाल मोरङमा बाल सुधार गृहमा भएको झडपको तथ्य पनि उनले दिन सकेका छैनन्। गृह प्रशासनले उनको नाकामीलाई नजरअन्दाज गर्नु नै उनको प्रशासनयन्त्रमा प्रभाव बलियो रहेको तथ्य ठहर्छ।