एक दशकपछि नेपाली फिल्ममा फर्किए अभिनेता गणेश उप्रेती, झरीपछिको इन्द्रेणी खेल्न अमेरिकाबाट काठमाडौं उत्रिए

काठमाडौं- 'यो गाउँको ठिटो म… कान्छा मेरो नाउँ, आउँदा जाँदै गर्नु है, सबैलाई रामराम' भन्ने लोकप्रिय गीतबाट दर्शकमाझ चिनिएका तथा ५० भन्दा बढी नेपाली चलचित्रमा अभिनय गरिसकेका चर्चित कलाकार गणेश उप्रेति झण्डै एक दशकपछि अभिनयमा फर्किएका छन्।

करीब १० वर्षदेखि अमेरिका बसोबास गर्दै आएका उप्रेति नेपाली चलचित्र ‘झरी पछिको इन्द्रेणी’ मा अभिनय गर्नका लागि  अमेरिका देखी नेपाल आएका हुन्। यस फिल्म मार्फत उनी नेपाली फिल्म क्षेत्रमा पुनरागमन गर्दै छन्।

चलचित्र ‘झरी पछिको इन्द्रेणी’ को छायांकन चाँडै सुरु हुने तयारीमा रहेको छ। 

लोकप्रिय हास्य टेलिभिजन सिरियल ‘सक्किगोनि’का कलाकार अर्जुन घिमिरे (पाँडे)को डेब्यु निर्देशनमा बन्न लागेको फिल्म ‘झरीपछिको इन्द्रेणी’बाट उनले अभिनयमा पुनरागमन गर्न लागेका हुन् । 

फिल्मको कथा गणेश उप्रेतीकै पात्रको वरिपरि घुम्ने बताइएको छ । यसअर्थ उनी फिल्मका मुख्य पात्र हुन् । उनीसहित फिल्ममा निर्मल शर्मा, रमेश उप्रेती, दीपाश्री निरौला, ‘मुन्नी’को रुपमा चर्चित प्रियाना आचार्य लगायतको पनि अभिनय रहने जनाइएको छ । सामाजिक कथामा बन्न लागेको फिल्मको बिहीबार ललितपुरस्थित धन्वन्तरी बाराही मन्दिरमा शुभ–मुहूर्त गरेर छायांकन थालिँदैछ ।

गणेश उप्रेती पछिल्लो पटक फिल्म ‘होमवर्क’मा देखिएका थिए, जुन २०१६ मा रिलिज भएको थियो । ‘भाग्य रेखा’बाट फिल्म करिअर सुरु गरेका उनले ‘लक्ष्मी पूजा’, ‘दैव’, ‘ए मेरो हजुर’ जस्ता फिल्ममा गरेको अभिनय सशक्त मानिन्छ । उनले सन् २००० मा प्रदर्शित फिल्म ‘छोरो’को निर्माण समेत गरेका थिए । अब उनी नेपाल बढी बसेर निरन्तर फिल्म गर्ने सोचमा रहेको जनाइएको छ ।