पत्नी हत्या गरी विदेशमा रहेका छोराछोरी र प्रहरीलाई फोन गर्ने ठाडामगर सेनाका पूर्वकर्मचारी

वीरेन्द्रनगर– नेपाली सेनाका पूर्वकर्मचारी दानसिंह ठाडामगरले दुबई र जापानमा रहेका छोराछोरी अनि प्रहरीलाई फोन गरी आइतबार पत्नी हत्या गरेको जानकारी दिएका छन्। 

सुर्खेतको वीरेन्द्रनगर नगरपालिका–१३ का उनले प्रहरीको नम्बर वडाध्यक्षसँग मागेका थिए। 

४२ वर्षीय ठाडामगरले ४१ वर्षीया पत्नी रविना थापाको आइतबार बिहानपख हत्या गरेको प्रहरीले जनाएको छ। हत्याको मुख्य कारण अहिलेसम्म नखुले पनि पत्नी थापा राती मोबाइल हेर्दाहेर्दै निदाएकोसम्म आएको छ।

उनले प्रहरीको फोन नम्बर माग्न वडाध्यक्ष दीपेन्द्रराज कोइरालालाई समेत फोन गरेका थिए।

नगर प्रहरी र करे खोला चौकीबाट प्रहरी टोली घटनास्थल पुगेको थियो। जिल्ला प्रहरी कार्यालयका सूचना अधिकारी (डीएसपी) मोहनजंग बुढथापाले मुचुल्का उठाएर शव पोष्टमार्टमका लागि प्रदेश अस्पतालमा लगिएको र ठाडामगरलाई नियन्त्रणमा लिएर अनुसन्धान गरिरहेको जानकारी दिए।

ठाडामगरले खाटको खुट्टा बनाउन राखिएको काठले टाउकोमा हिर्काएर हत्या गरेका थिए। उनको एउटा छोरो दुबईमा र एउटी छोरी जापानमा छन्। अर्की एउटी छोरी सुर्खेतमै छिन्।

पत्नी हत्या गर्नुको कारण आफैंलाई पत्ता नभएको बताएका ठाडामगरले मार्ने क्रममा ‘सैतान’ भनेको बयान दिएका छन्।