फेरि अर्की टीकटकरको विष खुवाएर हत्या, गत महिना पनि ‘स्टार टीकटकर’ मारिएकी थिइन्

काठमाडौं– पाकिस्तानको सिन्ध प्रान्तको घोटकी जिल्लामा टिकटक क्रिएटर सुमीरा राजपूतको शनिबार उनको घरमै शंकास्पद परिस्थितिमा मृत्यु भएको छ।

उनकी १५ वर्षीया छोरीले दाबी गरेकी छन् कि केही व्यक्तिहरू सुमीरामाथि जबरजस्ती विवाहको दबाब दिइरहेका थिए। सुमीराले विवाह गर्न अस्वीकार गरेपछि उनलाई विषालु चक्की खुवाएर हत्या गरिएको उनले बताएकी छन्।

सुमीरा राजपूत एक प्रसिद्ध डिजिटल कन्टेन्ट क्रिएटर थिइन्, जसका टिकटकमा ५८ हजार फलोअर्स र १० लाखभन्दा बढी लाइक्स थिए। उनकी छोरी पनि टिकटकमा सक्रिय छिन् र उसका पनि ५८ हजार फलोअर्स छन्।

यस घटनासम्बन्धी प्रहरीद्वारा दुई जनालाई हिरासतमा लिइएको छ। घोटकी जिल्ला प्रहरी अधिकारी अनवर शेखले पनि छोरीको दाबीको पुष्टि गरेका छन्। तर हालसम्म घटनासम्बन्धी कुनै एफआईआर दर्ता भएको छैन।

गत महिनामा पनि एक सोसल मिडिया इन्फ्लुएन्सरको हत्या

पाकिस्तानमा गत महिनासमेत १७ वर्षीया सोसल मिडिया इन्फ्लुएन्सर सना युसुफको इस्लामाबादस्थित घरमै गोली हानी हत्या गरिएको थियो।

हत्यारा व्यक्तिको शैक्षिक योग्यता म्याट्रिक मात्र थियो, उनी बेरोजगार थिए र निकै गरिब परिवारबाट आएका थिए। उनले सना युसुफलाई धेरैपटक विवाह प्रस्ताव दिएका थिए, तर सना प्रत्येकपटक अस्वीकार गर्थिन्।

हत्याको दिन उनले सना सँग घरबाहिर केही समय कुरा गरे, त्यसपछि घरभित्र प्रवेश गरी नजिकैबाट दुई गोली हानेका थिए, जसका कारण सनाकै घटनास्थलमै मृत्यु भयो।

९ वर्षअघि कन्दील बलोचको हत्या

पाकिस्तानमा यसअघि पनि थुप्रै सोसल मिडिया स्टारहरूको हत्या भइसकेको छ। ९ वर्षअघि कन्दील बलोच नामकी सोसल मिडिया स्टारको आफ्नै घरमै हत्या गरिएको थियो।

कन्दील बलोचलाई पाकिस्तानकी पहिलो सोसल मिडिया सेलिब्रिटी मानिन्छ। उनले आफ्ना बोल्ड र विवादास्पद भिडियो तथा पोस्टमार्फत चर्चा कमाएकी थिइन्, जसमा उनले दैनिक जीवन र महिलाको अधिकारका बारेमा कुरा गर्थिन्।

सन् २००८ मा १७ वर्षको उमेरमा कन्दीलको विवाह उनकी आमाकै चचेरो भाइ आशिक हुसेनसँग भएको थियो, तर शारीरिक र मानसिक यातनाका कारण उनले २०१० मा आफ्नो श्रीमान्‌लाई छोडेर कराँची गएकी थिइन्।

एक जना छोरा पनि उनले छोड्नुपरेको थियो। उनका बोल्ड तस्बिर र भिडियोको कारण पाकिस्तानमा निकै आलोचना भएको थियो।

१५ जुलाई २०१६ मा मुल्तानस्थित आफ्नै आमाबाबुको घरमा सुतेकै अवस्थामा उनको घाँटी थिचेर हत्या गरिएको थियो। उनका भाइ वसीमले हत्या स्वीकार्दै भनेका थिए कि उनी परिवारको इज्जत बिगार्दै थिइन्।

कन्दील बलोचले सनी लियोनी, राखी सावन्त र पूनम पाण्डेलाई आफ्नो प्रेरणाको स्रोत मान्थिन्।

२०२४ मा पाकिस्तानमा ५४७ अनर किलिङ

इस्लामाबादस्थित स्वतन्त्र संस्था सस्टेनेबल सोसल डेभलपमेन्ट अर्गनाइजेशन (SSDO) का अनुसार, सन् २०२४ मा पाकिस्तानभर ३२ हजारभन्दा बढी लैंगिक हिंसाका घटना दर्ता भएका थिए, जसमा ५४७ अनर किलिङका घटनाहरू थिए।

यीमध्ये ३२ घटनाहरू बलुचिस्तानमा भएका थिए, तर तीमध्ये मात्र एउटामा सजाय दिइएको थियो।

पाकिस्तानका प्रमुख मानव अधिकार संगठन HRCP का महासचिव हैरिस खालिकले भने, “अनर किलिङ तानाशाही प्रवृत्तिको परिचायक हो, जुन पाकिस्तानका धेरै भागहरूमा अझै जीवित छ।”

उनले अल जजीरासँग भनेका थिए, "राज्यले कानूनी शासन स्थापना गर्न र नागरिकको जीवनको अधिकार सुनिश्चित गर्नुभन्दा सट्टा कबिला प्रमुखहरू र सामन्ती नेताहरूलाई संरक्षण दिएको छ, जसले आफ्नो सत्ता र स्थानीय स्रोतसाधनमा नियन्त्रण कायम राख्न यस्ता परम्परालाई बढावा दिन्छन्।”