के सदनमा रास्वपा सांसद सोबिता गौतमले उठाएको विषय ‘कच्चा’ हो?

काठमाडौं– प्रधानमन्त्री केपी शर्मा ओलीसँग स्पेन भ्रमण दलमा गएका मानिस नफर्किएको विषय रास्वपा सांसद सोबिता गौतमले सदनमा उठाएकी छन्।

यो प्रश्न मात्र नभएर गम्भिर प्रकृतिको एक प्रकारको आरोप हो। उनले कसैको नाम र तथ्य उल्लेख नगरी भनिन्,‘प्रधानमन्त्री केपी शर्मा ओली सहभागी भएर फर्किएको स्पेनको कार्यक्रममा गएका केही व्यक्तिहरू स्वदेश नफर्किएको समाचार आइरहेको भन्दै यसबारे समेत छानबिन हुनुपर्छ।’

मंगलबार प्रतिनिधि सभा बैठकमा गौतमले उठाएको विषय अहिले चलिरहेको भिजिट भिषा प्रकरणसँग सम्बन्ध राख्ने प्रकृतिको हो। 

उनले भनिन्, ‘स्वयं प्रधानमन्त्रीज्यू जानुभएको स्पेनको कार्यक्रममा समेत सहभागी हुने बहानामा गएर नफर्किएको भन्ने समाचारहरू पनि आइरहेका छन्। यसमा व्यक्ति विशेष हाम्रो केही आरोप छैन। तर यो अत्यन्तै गम्भीर विषय हो।’

गौतमले भिजिट भिसा दुरुपयोगको अनुसन्धानका लागि सरकार गम्भीर नभएको भन्दै संसद् बहिस्कार गर्ने बताइन्। 

यता सोबिताको प्रश्नबारे प्रधानमन्त्रीको सचिवालयले ध्यान आकृष्ट गरेको छ। कच्चा विषय उठान गरेको संकेत गर्दै सचिवालयले भन्यो,‘स्पेनबाट को फर्किएन?’

सचिवालयले प्रधानमन्त्रीको हालै भएको स्पेन भ्रमणमा गएकामध्ये को स्वदेश नफर्किएको हो नाम बताइदिन गौतमलाई लक्ष्य गर्दै आग्रह गरेको छ।

सचिवालयका एक जना सदस्य भन्छन्, ‘प्रधानमन्त्रीज्यूको स्पेन भ्रमणमा गएका को फर्कनुभएन, उहाँले नाम बताइदिनुहोस् नत्र यस्ता हलुका विषय सदनमा उठाउन भएन।’

रास्वपा सांसद गौतमले प्रतिनिधि सभामा बोल्दा स्पेन गएको को स्वदेश फर्किएन भन्ने नाम भनेकी थिइनन्।

प्रधानमन्त्री ओलीसँग स्पेन जानेको नामावली यस्तो छ।