रास्वपाले सोध्यो- प्रधानमन्त्रीसँग स्पेन गएकाहरू नफर्किएका समाचार के हो ?

काठमाडौं- राष्ट्रिय स्वतन्त्र पार्टी (रास्वपा) ले प्रधानमन्त्रीसँग स्पेन भ्रमणमा गएकाहरू नफर्किएको भन्ने विषयमा संसदमा प्रश्न गरेको छ ।

आज (मंगलबार) प्रतिनिधि सभाको बैठकमा सांसद सोविता गौतमले प्रधानमन्त्रीसँगै स्पेन पुगेका केही व्यक्तिहरू नफर्किएको समाचार सुनिएको भन्दै प्रश्न गरेकी हुन् ।

उनले भनिन्, ‘रास्वपा भिजिट भिसाको दुरुपयोग गरी मानव तस्करी गर्नेविरुद्ध संसदीय छानबिन समिति वा उच्चस्तरीय जाँचबुझ आयोगको मागसहित यो सदनमा उभिएको छ । स्वयम् प्रधानमन्त्री जानु भएको स्पेनको कार्यक्रममा समेत केही मानिसहरू कार्यक्रममा सहभागी हुने बहाना गरेर नफर्किएको भन्नेलगायतका समाचारहरू आएका छन् । यो अत्यन्त गम्भिर विषय हो ।’ प्रधानमन्त्री ओलीसहितको सरकारी टोली गत १४ असारमा स्पेन गएको थियो ।

संयुक्त राष्ट्रसंघको ‘विकासको लागि वित्त (फाइनान्सिङ फर डेभलपमेण्ट) चौथो अन्तर्राष्ट्रिय सम्मेलन’ मा सहभागी हुन गएका प्रधानमन्त्री ओलीसहितको टोलीमा अन्य व्यक्ति पनि गएको र उनीहरू नफर्किएको उनले बताएकी हुन् । ‘केही समयदेखि भिजिट भिसाको दुरुपयोग गरी निकृष्ट कार्यविरुद्ध संसदीय छानबिन समिति र उच्चस्तरीय जाँचबुझ आयोगको मागसहित विरोधमा उभिएको छ,’ सांसद गौतमले भनिन्, ‘यो कार्य त्रिभुवन विमानस्थलभित्र मात्रै होइन, विभिन्न कार्यक्रमको बहनामा नेपालीलाई लोभ प्रलोभनमा पारी लैजाने गिरोहसँग पनि जोडिएको विषय हो ।’

आफूहरूले कुनै व्यक्ति विशेष गरी अरोप नलगाएको बताउँदै सांसद गौतमले यस्तो गम्भीर विषयमा टालटुले समिति बनाएकोप्रति आफूहरूको आपत्ति रहेको बताइन् । ‘यो व्यक्ति विशेष कतै पनि हाम्रो आरोप छैन । सरकारले नेपाली जनताको जीउधन, र अन्तर्राष्ट्रियस्तरमा नेपालको छवि जोडिएको यस्तो गम्भीर विषयमा पनि उच्चस्तरीय छानबिन समिति नबनाएर स्वार्थ बाझिने, अनुपयुक्त पात्रको नेतृत्वमा आफू मातहतकै आफूभन्दा कनिष्ठ कर्मचारीहरू सम्मिलित टालटुले समिति बनाएकोमा हाम्रो खेद छ,’ सांसद गौतमले भनिन् ।