राजनीतिमा खास छ १७ असार, १८ मा के हुँदैछ?

काठमाडौं– आगामी मंगलबार नेपालको राजनीतिक स्थितिमा खास दिन बन्ने भएको छ। त्यसको भोलिपल्ट भने संवैधानिक निकायको विषयमा फैसला हुनेछ।

असार १७ गते यो सत्ता गठबन्धन बनेको एक बर्ष पूरा हुन्छ। योसँगै प्रधानमन्त्री केपी शर्मा ओलीको बर्ष दिनको सरकारको समीक्षा पनि हुनेछ। 

यहि सन्दर्भमा कांग्रेस र एमालेबीच कतिपय विषयमा असमझदारी भएका छन्। तर सभापति शेरबहादुर देउवाले फरक दल भएका कारण यस्ता असमझदारी सामान्य रहेको प्रतिक्रिया दिइसकेका छन्। 

देउवाको स्थीरताका कारणले यो गठबन्धन एक बर्षसम्म निरन्तर टिकेको पनि विश्लेषण भएको छ। 

गठबन्धनको बर्ष दिनबारे एमाले र कांग्रेसले धारणा सार्वजनिक गर्नेछ। 

सोही दिन रास्वपा महामन्त्रीमा मुकुल ढकाल फर्काउने कि नपर्ने भन्ने सर्वोच्च अदालतले पनि आदेश दिनेछ। 

विहीबार मात्र कुमार रेग्मीको इजलाशले मुकुल ढकालको रिटमा रास्वपाका अधिकारीलाई पनि छलफलका लागि बोलाएको छ। नेपालको इतिहासमा कारण देखाऊ आदेश जारी गर्दै छलफलमा बोलाएर आदेश आउने दिन पनि हो। 

सम्भवतः यो आदेश राजनीतिक सन्देश दिनेगरी मुकुल ढकालको पक्षमा हुन सक्ने अनुमान गरिएको छ।

त्यस्तै, त्यसको भोलीपल्ट पनि सर्वोच्च अदालतको संवैधानिक इजलाशले ५२ जना संवैधानिक आयोगका नियुक्त पदाधिकारीविरुद्ध परेको रिटमा आदेश दिने मिति तय भएको छ। 

अख्तियार दुरुपयोग अनुसन्धान आयोगलगायतका पदाधिकारी रहने या नरहने भन्ने सोही दिन टुंगो लगाउने तय भएको छ।